Kar kalta khan Hachhek bial Zawlnuam khuaah mnf candidate Pu Robert Romawia Royte puibawmtute chuan mipui tan tuizem (sintex) tam tham tak an sem a. He tuizem sem hian Social media a luah tam hle mai. Hman deuh lawk khan helai bialah hian mipui lawm loh zawngin nasa taka ruai theh ani tawh bawk. Yuizem dawngtute han lawmpui dawn phawt ila. An sem chhan ber inthlanah pawh a semtu an vote ngei ring ila.
Amaherawhchu social media a sawitu tam ber chuan hetianga vote zawn hi an dem hle a. Mizoram mipuiina kan duh loh em em, kohhran leh society pawhin an duh loh ber niin an tarlang a ni. Kan inthlan turah hian mipui hian sawrkar tha din an duh a. Kan sawrkar kal mekah duhkhawp lohna lian tak an nei tih hi media chi hrang hrangah a lang chiang hle a. Hetianga hi mipui vote lei tum hi kan ram hmelma leh ram tichhetu berah an puh ani bawk.
Inthlanna thianghlim leh sum leh paia inleina, inthlemna awm lo an beisei sang hle. Chumi ti thleng tur chuan kohhranin a din Mizoram Peoples Forum, kan society a pawl pawimawh zawng zawng, political party tin telna chuan hma a la chho mek a. Tunhma khan Manipur inthlanah vote inleina a hluar zia leh an thil sem kan sawi nasa thin hle. Manipur inthlanah chuan jeans, pheikhawk tha tak tak leh thil dang dang an sem nasat thu sawiin mizoram mipuiin mak kan ti thin a. Mahse, tunah chuan kan tualchhung ngeiah a takin kan politiciante chuan an ti ve ta miah miah mai a. A semtu lam hian inthiam lohna pawh an nei chuangin a lang lova. Tumah an hmai zah lova. A dawng tur mipui chu ualau takin an ko khawm mup mup mai. Inthiam loh sawirik a hnehin hetiang sem thei nih hi an inchhuang zawk a. Social mediaah intithei takin an vawrh darh chuai chuai ngam a. Mipuiin an duh lohna chu engahmah an ngai tawh lo tih a chiang hle.
Kan inthlan turah hian thianghlim taka mipuiin duh thlanga vote an thlakna tur kawng chu dan pin mek a ni a. Pawisa faia vote lei leh inthlan dawna therhlo sem hi a danglam chuang lova. An tum chu pawisa hmanga intih tlin ani mai a. Hetianga ualau taka kan politiciante an tal hi kohhran, yma, etc te hian eng chen nge kan phal dawn le. Ram siamthat kan duh a. Mahse, ram siamthatna kawng dala pen mekte chung changah ngaihthiamna kan nei reng mai dawn em ni? Sawrkarna an siam huna eirukna, induhsak bikna, mipui pawisa hnuhkawina, dik lo taka contract inpekna, hleih neihna kawnga min kalpui mektute hi kan titawp ngam em? Inthlanna thianghlim kan neih theihna tura min zirtirtute hian hma an la ngam dawn lo anih chuan hmabak a va thim em? Hma an la ngam lo anih chuan mipuiin an thu kan zawm zel dawn em? An thu zawm tlak loha an awm si chuan engnge tih tur an neih?
Hetiang hi kan kal dan anih chhoh chuan ram hmangaiha, ram siamthat duhtute tan chuan a beidawnthlak takzet dawn a. Kan innghahna ten engmah an tih siloh chuan mahni remhriat dana vote zawn ve mai hun a lo thleng ang a, chutih hunah chuan inthlanna thianghlim ni tawh lovin, tharum thawhna nen kan inthlang mup mup ang a. A hmamraw nei tha tha an dingchang ngei dawn a. Bihar inthlanna rapthlak an sawi thin ang kha kan hma lawkah hian a thleng ve thei reng ani tih hriain kan beisei pawl hrang hrangte han che chhuak thuai teh se. Thim chhah kan thlen hma ngei hian lo pen chhuakin, boruak chhe chho mek hi han vaikiang duak duak mai teh se. Chu chauh chu beiseina meiling de sêt sêt kan neih chhun chu a ni ta.