North Korea chuan thlawhna kahna, anti-aircraft missile thar chu Ningani khan a enchhin leh a, hei hi thla khat chhunga ralthuam a enchhin vawi lina a ni tawh.
An ralthuam enchhin thar ber hi hypersonic missile a enchhin hnu lawka a tih a ni a, hypersonic missile hi nuclear ralthuam ni ngeia rin a ni.
United States Secretary of State Anthony Blinken chuan hetianga ralthuam an enchhin reng hian himna leh ngialnghehna a tiderthawng niin a sawi.
Pyongyang chuan an ralthuamte hi anmahni an inven nan an mamawh niin an sawi a. US leh South Korea chu anmahni aiin a letin ralthuam lamah hma an la niin an sawi bawk.
Hrekna na tak tuar mek mah se tun hnaia an ralthuam enchhin hian Pyongyang chuan ralthuam siamna lamah inkiltawihna leh inthlahrunna engmah a nei chuang lo tih tilang.
Sorkar thupuanna, KCNA chuan anti-aircraft missile thar chu ral beih nana tha a nih thu leh technology thar pawimawh tak taka thuam a nih thu a tar lang.
Ralthuam an enchhin leh hma chiah hian North Korean hruaitu, Kim Jong-un chuan South nena inkawmngeiha an inbiakpawhna, communication hotline pawh tihnun thar leh tha a tih thu a sawi.
Kim-a hian US chu inbiakna tikhawlhkhamah a puh a. Khawvel hmaa a lan mawi lohna turin thil a tikual niin a puh bawk.
Mi thiamte chuan Kim-a thu sawi dan hmangah hian Pyongyang hian Washington leh Seoul hi a hranga kalpui a tum niin an ngai a. South Korea biak thata US erawh thlauhthlak a tum niin an ngai a ni.
Hetih rual hian North Korea hian Seoul hi US-in an hrekna tiziaawm tura nawr turin a be tha duh a ni thei bawk.