Lengteng bialtu MLA Dr. L. Thangmawia’n VC, LC leh Municipal-a hmeichhiate tana seat hauhsak luahkhattu tur harsa taka a zawna zawn chawpna a tam thin niin a sawi a. Lok Sabha leh Rajya Sabha-in MP leh MLA inthlanah seat za-a 33 hmeichhiate tana hauhsak a remtih tak avangin Mizo hmeichhiate lo inbuatsaih lawk turin a chah.
Tun thla ni 28 leh ni 29-a MHIP Ngopa block conference leh silver jubilee lawmna Ngopa-a neih a hmanpuinaah he thu hi bialtu MLA Dr. L. Thangmawia’n chuan a sawi a. MP leh MLA inthlana seat za-a 33 hmeichhiate tana hauhsakna dan hman a nih hunah Mizorama MLA bial 40-a bial 13 chu hmeichhe tana hauh a nih tawh dawn avangin Mizo hmeichhiate mahni inphata, mipui leh ram leh hnam tana thawk tura thutlukna lo siam lawk turin a ngen.
Dr. L Thangmawia chuan Mizo hmeichhia te an chhuanawm chho hle nia sawiin, board leh university exam hrang hrangah leh MPSC leh MSSSB exam-ah te pawh mipa tam tak tluk loh an nih tak thu leh a lawmpui thu a sawi a. “Kan nula ten Mizo mipa te chona nasa tak min hmachhawn tir mek a ni” a ti a. MHIP Ngo- pa block Silver Jubilee lawmpui na Rs. 50,000 a pe nghal bawk.
Ngopa block MHIP hian Pawlrang, Ngopa, Lamzawl, NE Khawdungsei, Khawkawn, Chiahpui, Kawlbem, Teikhang, Hrianghmun leh Mimbung khua te a huam a ni.