Aizawl: Tun hnaia Mizoram sorkar cabinet meeting-in zirna school grand in aid pe tura a tih zingah Zasai Memorial High School, Siaha chu school awm tawh lo a nih thu MPCC Media Chairman Lalremruata Renthlei-in a sawi.
Inrinnia Aizawl Press Club-a thu thar thehdarhtute a kawmnaah Lalremruata Renthlei hian tun hnaia Council of Minister thukhawm chuan school 180-te chu provincialised-in, Lumpsum grant-in-aid a awm mek school 52-te chu tun hmaa la awm ngai lo provisional adhoc grant-in-aid ah a hlang kai bawk tih sawiin, “Heng bakah hian lumpsum grant-in-aid a hlankai school 31 an awm bawk a. School provincialised leh upgrade thar zawng zawngte chu school 263 lai a ni,” a ti.
MPCC media chairman chuan grant in aid pe tura an tih zingah Zasai Memorial HS, Siaha chu school awm tawh lo (defunct school) a nih thu a sawi a. He school hi Siaha MNF MLA candidate tur Lalmalsawma Zasai pa, Zasai hriatreng nana school din a nih thu leh, kum tam kal tawh a tihtawp tawh niin, a building apartment-te pawh mi malin khawsak nan an luah deuh vek tawh niin a sawi.
Mizoram chhungah mi mal, khawtlang leh Kohhran school tam takin sorkar tanpuina an dawn ve theih loh laia Siaha MNF MLA candidate tur, Lalmalsawma Zasai te chhungkaw school Zasai Memorial HS school awm tawh lo MNF sorkar tanpuina dawng tur an thlang mai chu Zoram mipuite mak tih a tling tih sawiin, “School awm tawh lo adhoc-a a dah ta mai hi cabinet meeting hi a lu a hai em ni?” Lalremruata Renthlei chuan a ti.
Mizoram sorkar pawh school awm tawh lo tanpuina pek tur an tih school hi paih nghal a, thil dik lo titute chhui chhuaka danin a phut angin an phu tawk hremna pe ngei tura an phut thu sawiin MPCC media chairman chuan, “Kum tam tak chhung Zasaia Memorial School hi awm tawh lo a ni chungin, sorkar atanga tanpuina a hmu reng thin em tih hi kan zawhna a ni,” tia sawiin, mi mal induhsakna avanga school awm tawh lo, duhsak uchuaka tanpuina pek zui reng hi a rang thei ang bera sut leh turin Congress party-in Mizoram sorkar a ngen tih a sawi bawk.