Aizawl: Sorkar laipui ruahmannain nimin khan ram chhung hrang hrangah faina beihpui thlakna ni hman a ni a, Mizoramah erawh Pathianni a nih avangin Mizoram sorkar chuan a hmang ve lo a, vawiinah faina hnatlangpui hi neih a ni ang.
Pathiannia faina hnatlang neih tur hi Mizoramah chuan kalpui duh lo in Mizoram Kohhran Hruaitute Committee (MKHC) chuan Chief Minister Zoramthanga chu tunhnai khan hmuin Pathianni a faina beihpui thlak hi Mizoramah chuan ti ve lo turin an ngen a, Central YMA pawhin Kristiante ni serh Pathianni kher sorkar thil pawimawh buatsaih hi tha an tih loh thu an lo sawi tawh bawk a ni.
Hemi hnu, Inrinni khan Chief Minister Zoramthanga chuan a Instagram account-ah Mizoramah chuan faina hnatlangpui chu October 1-ah neih a ni dawn lo tih tar langin, “October 1 hi Pathianni (Sunday) a nih avangin Kohhran mite tan he ni-ah hian faina beihpui thlak a remchang dawn lo va; chuvangin, kohhran member-te tel vek theih nan a tuk, October 2, 2023 atangin faina beihpui thlak hi kalpui tura ruahmanna siam a ni,” a ti.
Hemi chungchang hian UD&PA secretary Lalmalsawma Pachuau pawhin hriattirna a tichhuak a, October 2-ah faina beihpui thlak chu kalpui tan a nih tur thute, hei hi UD&PA-in a lo kalpui thin faina hapta intanna a ni nghal dawn tih a tar lang.