Liverpool in huntawp dawnah Joel Matip own goal avangin an point an sual chhuah teuh viau hnuah an hloh a, 2-1 in Tottenham Hotspur lakah an tlawm.
Inrinni zana Tottenham Hotspur Stadium a inkhelah sawizui tur a tam a. Reds in league hmahruaitu nih theihna remchang an neih zanah beiseina sang tak neiin bul tan mahse red card sawi hlawh vawi hnih an hmu a. An laka goal pawm loh chuan sawisel a hlawh bawk.
Reds midfielder Curtis Jones chu minute 26-naah Yves Bissouma hlauhawm taka a tlawh avangin VAR hmanga ennawn hnuah a yellow card chu red card a thlak a ni a. Second half-ah substitute Diogo Jota chuan zing taka yellow card a hmuh nawn avangin minute 69-naah hnawhchhuah a ni leh bawk.
Thutlukna sawihlawh zingah Liverpool in Luis Diaz hmanga goal an khung an pawm loh chu a dik lo niin a lang. VAR hmanga endik hnuah pawm a ni lova, nimahsela inkhel zawhah referee intelkhawm pawl Professional Game Match Officials Limited chuan thutlukna siam dik loh a nih thu sawiin thupha an chawi.
He inkhelah hian halftime hma in Spurs tan captain Son Heung-min chuan goal hmahruai a khung a. Mahse tlem zawk chungin Liverpool in halftime dawnah Cody Gakpo hmangin an sut.
Second half-ah Spurs in chak tumin nawr mahse Reds an tang khawng tlat a, a tawpah erawh Spurs in an mamawh goal an nei.
Tottenham Hotspur manager Ange Postecoglou chuan, “Second half-ah kan tha viau in ka hria. Vawiin hi kan tan chona dang leh a ni a, thil tam tak kan hmachhawn a ngai a, vawiinah chak turin kan lantir ngai loh lam theihna kan lantir a tul.” tiin a pawlte a fak.
Liverpool boss Jurgen Klopp chuan, “Outfield player pariat chauh nen chuan a harsa a, tlahniam ngei mah ila hlauhawm lai chu kan nei tho.” a ti a. Thutlukna siamte a sawisel hlawm bawk.
Gunners tan a pawimawh
Inkhel dangah Arsenal in Vitality Stadium-ah AFC Bournemouth 4-0 in an hneh a. Bukayo Saka, Martin Ødegaard, Kai Havertz leh Ben White ten goal khungin point thum pawimawh an hmu.
Hnehna la chang vek Manchester City chu Wolverhampton Wanderers in an barakhaih a, 2-1 in an hneh.
Molineux Stadium-ah Wolves tan Hwang Hee-Chan chuan chakna goal a khung.
Brighton & Hove Albion lakah Ollie Watkins chuan hattrick siamin Aston Villa hnehna a chanpui bawk.