Meghalaya-a dan leh thupek kengkawhtute chuan Pathianni khan a ruka dan phal lovah khuh damdawi hlauhawm tak siamna hmun an hai chhuak.
Khuh damdawi lem siam chhuahah hian a ngawl vei awlsam tak, phensedyl tam tak telh a ni a, thenawma Bangladesh-ah an thawn lut thin.
Police hian East Jaintia Hills district-a Khliehriat-a kudam pakhat chu thu an dawn bawhzuiin an dap a. SP Jagpal Dhanoa chuan khuh damdawi lem bur 9,883 zet an hau chhuak a, mi man pawh an nei tih thuthar lakhawmtute hnenah a sawi.
Ummulong-a a siamna hmun an hai chhuahah hi an chhui zui nghal a. Factory neitu chuan an thil siam chhuahte hi ramri kânpuiin Bangladesh-ah an thawn lut thin niin a sawi.
Police-in an mante hi elcodyl cough syrup bur 600, flavoring agent um 10, food coloring um 11, phensedyl thahnem tak leh damdawi lam inziahna lehkhabu eng emaw zat a ni tih Dhanoa chuan a sawi.
Heng bakah hian carton, phensedyl label, bottle leh a chhin, bottling machine leh pawisa Rs 11,000 an hai chhuak tel a. Mi pahnih an man nghal bakah a hnuah Assam-a phur luhnaa inhnamhnawih nia an hriat mi pakhat an man zui bawk.
May thla khan West Garo Hills vela tlawmngai pawl pakhat chuan Garo Hills Autonomous District Council (GHADC)-a Taxation department hnenah allopathy damdawi zuartute hnenah Trading for Non-Tribal (TNT) license an pek an lo sawisel tawh.
License pek chungchang hi Durama Imbama Norimbi Dikkimbi A’chik Magiparang (DINDAM) NGO-in Garobadha bazar, South West Garo Hills (SWGH)-a hawker pathumin allopathy damdawi an hralh lai an man atangin an sawi chhuak a ni.