Maharashtra-a Nanded-a sorkar damdawi inah darkar 24 lek chhungin nau piang hlim 12 leh hetiang zat bawk puitling an thi niin dean-in a sawi a, damdawi leh thawktu an indaih loh vang niin a sawi bawk.
Thi zinga puitling 12 hi ‘natna hrang hrang an ni a, a tam zawk chu rul chuk vang a ni’ tih Shankarrao Chavan Government Hospital-a dean chuan a sawi.
“Dakrar 24 liam ta chhungin nausen hmeichhia leh mipa paruk ve ve an thi a. Puitling 12 an thi bawk a, a tam ber hi rul chuk an ni a. Thawktu tam tak sawn an nih avangin harsatna tam tak kan tawk mek a ni,” a ti.
“Tertiary-level care centre chauh kan ni a, kan awmna atanga km 70 leh 80 inkar vela mite tuam tur kan ni a. Damlo hla tak taka miten min pan lawi si a. A chang phei chuan damlo an pung hluai zel a, kan budget pawhin a daih lo a ni,” a ti.
“Institute Haffkine a awm a, chuta tang chuan damdawi kan lei thin a; mahse, min daih vek lo va, tual chhunga mi kan lei a, chu chu kan pe thin,” tiin dean chuan a sawi.
Dean-in damdawi leh sum an tlachham nia a sawi chungchang hi damdawi in chuan a pha thung a. “Damdawi mamawh zualpui chu a awm a, damdawi in hian fund Rs. vaibelchhe 12 a ni a. Kuminah hian Rs. vaibelchhe 4 pawm a ni a, damlo dangte pawh an mamawh ang zela enkawl an ni,” an ti.
“Puitling damlo 12 (mipa panga leh hmeichhia pasarih) leh naupang 12 an awm a. Puitling zinga pali hi lung na, pakhat tûr ei, pakhat pum tha lo, pahnih kal tha lo, pakhat nau pai fel lo leh pathum accident tawk an ni a. Naupangte zinga pali hi mi mal damdawi in atanga an rawn thawn a ni,” tiin an thuchhuahah an tar lang.
Thihna thleng chu ‘a vanduaithlak’ a tih thu Chief Minister Eknath Shinde chuan Mumbai-a thuthar lakhawmtute hnenah a sawi a, engnge thleng report kimchang an ngaihchan mek thu leh a tul ang zela an bawhzui tur thu a sawi bawk.
Thihna thleng tam chhui tur hian committee din a ni tih Dr Dilip Mhaisekar, Director, Medical Education & Research, Maharashtra chuan PTI a hrilh bawk.
“Chhatrapati Sambhajinagar (Aurangabad tih thin) district-ah member pathum awmna expert committee din a ni a, naktuk (Thawhlehni) chhun dar 1:00-ah report pe turin kan ti a. Kei ngei pawhin damdawi in hi ka tlawh nghal a ni,” a ti.
Maharashtra-a eptute chuan Shinde-a sorkar chu beih nan an hmang a, ‘sorkar khawlpui pathum (BJP, Shinde-a kaihhruai Shiv Sena leh Ajit Pawar-a kaihhruai NCP) chuan mawh an phur’ tiin an sawi.
“Nunna 24 lai chân a ni a, na tak 70 an la awm a. Damdawi hmanrua leh thawktu an indaih lo. Nurse tam tak sawn an ni a, an aiawhtu tur dah an ni leh lo. Khawl tam takin hna an thawk thei lo va, damlo 500 awmna tura duanah 1,200 dah luh an ni a. Ajit Pawar-a ka sawipui dawn a, sorkar hian hetiang thil hi uluk taka enin a thunun tur a ni,” tiin chief minister hlui, Congress hruaitui hlun, Ashok Chavan-a chuan Thawhtanni chawhnua damdawi in a tlawhnaah a sawi.
“Khawlpui pathum nei sorkar hian pawisawi lo mi 24-te thihnaah hian mawh an phur,” tiin Sharad Pawar-a fanu, Supriya Sule-i chuan a sawi.
“Darkar 24 chhungin Nanded-a sorkar damdawi inah sorkarin damdawi a pek loh avangin nau piang hlum 12 nen mi 24 an thi a. Kût leh thil tih khawm lam sawi lar viau si sorkar tan a zahthlak a ni,” tiin Sharad Pawar-a kaihhruai NCP thupuangtu, Vikas Lawande chuan X-ah a tar lang bawk.
Maharashtra-ah hian thla hnih pawh la liam lo, August khan Chhatrapati Shivaji Maharaj Hospital, Kalwa, Thane-ah darkar 24 chhungin damlo 18 zet an lo thi tawh a, an zinga 12 hi kum 50 chung lam an ni nghe nghe.
Thite hi kala lungte awm, tak chak lo, ulcer, pneumonia, khawvartui in, septicemia leh natna dang neite an ni hlawm tih Thane civic commissioner Abhijit Bangar chuan a sawi.
He thil thlen hnuah hian thuneitute chuan damlo la awm zawng zawng chu a bul hnaia Civil Hospital-ah an sawn nghal vek a ni.