Aam Aadmi Party (AAP) Mizoram chuan India rama democracy palzut duh lohna lantirin nimin khan Vanapa Hall kawtah an pungkhawm a, Prime Minister Narendra Modi thlalak an hal.
He hunah hian AAP NE Incharge Rajesh Sharma chuan thu sawiin, Prime Minister Modi-a chu India ram anti-democratic rama siamah puhin, BJP-in lalna chan ringawt an duh a, India ram chu an then hrang mek tih tih a sawi a, AAP Rajya Sabha MP Sanjay Singh-a’n Manipur tan theihtawp a chhuah lai meka Modi leh Adani tangkawpin chhan nei miah loa an man mai chu mak an tih thu te, BJP lungrual taka do ho vek a nih chuan democracy leh India constitution chu humhim a ni dawn tih a sawi.
AAP Mizoram President Andrew Lalremkima pawhin thu sawiin BJP sorkarin mipui zalenna nasa takin an rap bet mek tih te, India ramah sakhaw zalenna a awm zel theihna turin mipui tanrual a ngai tih sawiin, ramin hma a sawn theihna daltute chu do zel turin Mizo mipuite a chah a ni.