Siaha bialtu MLA Dr K Beichhua chuan MLA a nihna atanga bânna a thehlut a, nizan khan BJP-ah lawm luh a ni.
Dr K Beichhua chuan Ningani khan Assembly Speaker Lalrinliana Sailo hnenah bânna hi a thehlut a, speaker-in a pawmpuina a ziah hnuah nimin khan bânna lehkha hard copy chu Assembly Commissioner & Secretary Lalhmahruaia Zote hnenah a thehlut leh ta a ni.
Bânna lehkha a thehluh zawha chanchinbu mi thenkhatin an kawmnaah Dr K Beichhua chuan MNF atanga bân a nih hnuah khawi party nge a zawm ang tih a ngaihtuah nasat thu leh BJP-a lut tur thutlukna a siam ta tih a sawi a, sorkar laipuia BJP kaihhruai sorkar hmalakna chu tha a tih thu te, India economy a chawikan dante chu ropui a tih thu leh India hmarchhak state leh hnam tlem zawkte a duhsak dan te chu tha a ti a, BJP lam chu awn ta a nih thu a sawi.
A bial ngaiah BJP ticket-in a tlin leh ngei a beisei tih a sawi rualin kumin MLA inthlanpui neih turah party mala sorkarna siam thei an awm a rin loh thu leh BJP chu sorkarnaah an tel ve ngei dawn tih a sawi bawk.
Dr Beichhua hi kum 2013 leh 2018 MLA inthlanpuiah Siaha bialah MNF ticket-in MLA atan thlan tlin a ni a, MNF sorkarah minister of state niin chief minister-in ti tura a tih angin December 13, 2022 khan minister a nihna atangin bânna a thehlut a, January 25, 2023 khan MNF party atangin bân a ni.
Hun rei tak chhung independent MLA anga a awm hnuah MLA a nihna atanga bânna chu thehlutin nizan khan Union Minister of State John Barla chuan BJP-ah a lawm lut a, BJP ticket-in a bial ngaiah a ding ngei tura ngaih a ni.