MNF Thalai chuan nimin khan Aizawl Press Club-ah thu thar thehdarhtute an kawm a, MNF sorkar chu an aia sorkarna chang rei tawh aia ram chhunga zirna tihhmasawnna kawngah hna an thawk tha lawr lak niin an sawi.
Mizo National Youth Front (MNYF) President L Thangmawia chuan zirna hi thil pawimawh berte zinga mi a nih avangin khawvel sorkar zawng zawngten ngaih pawimawh berah an nei mek a. MNF pawhin Mizorama sorkarna a chan apiang hian zirna a ngaih pawimawhzia a lang fo tawh thin nia sawiin, “MNF aia sorkarna chang rei party aiin zirnaa a sulhnu hi a tam lawr lak a ni,” a ti.
L Thangmawia chuan MNF sorkar hmasa hun lai, kum 1998-2008 chhung khan mipuiten zirna an ngaihhlutna avanga an insensona chu ngai thu takin sorkarin a chhawk dan tur ruahmanna thar, Adhoc Grand in-aid (GIA) leh Lumpsum GIA a duang chhuak tih a sawi.
MNYF president chuan MNF sorkar term thum (1998-2003, 2003-2008 leh 2018-2023) chhung hian sikul 466 provincialised niin, sikul 259 Adhoc GIA-ah hlan kai a ni a. Sikul 404 zette chu Lumpsum GIA-ah hlang kaiin a vaia MNF sorkarin sikul a upgrade tawh zawng zawng hi 1,129 zet a nih tawh thu a sawi a. Kum 2008-a MNF sorkar a tlak khan a thlaktu Congress sorkar chuan MNF sorkarin GIA hmanga mipuite a chhawkna sikulte chu ‘kih hnawk’ tiin, kum kua chuang zet a hlamchhiah chhunzawm niin a sawi.
MNF sorkar term hmasa (1998-2003 leh 2003-2008) chhung khan Hindi zirtirtu 1,187 lakte chu MNF sorkar loh kum 10 chhung khan bân lek vek an nih thu te, operation black board hnuaia a nghet lova thawk zirtirtu 277 te, CSS Hindi zirtirtu 491 zet te dah ngheh an nih thu te, sikul building sang thum chuang sak zawh hman a nih thu te a sawi bawk.
L Thangmawia chuan tun MNF sorkar kal mekah Covid hripuiin nasa taka a tihbuai karah mipui duh dan anga school timing her rem a nih thu te, hnam hmangaihna nen zirlaiten hlawhtling taka an zirchhuah theih nan hmalak a nih thu te, sikul zawng zawngah zirlaiten Pathian tihna leh hnam hmangaihna rilru an neih theihna a nih beiseiin ‘Ro Min Rel Sak Ang Che’ tih hlapuia hmang tura hmalak a nih thu te, tawng intawm (common language) neih a tulzia hriaa Mizo tawng humhalh leh tihausa zel turin Mizo Language Development Board (MLDB) dinna tur bill chu Assembly-ah March 10, 2022 khan pass niin tunah hian office-te peih tawhin chairman pawh ruat fel tawh a nih thu a sawi.
Hei bakah high school Science leh Mathematics zirlaibute Mizo tawng leh saptawng (bilingual)-a dah a nih thu te, Class 6, 7 leh 8 zirlai te tan ZONUN tih lehkhabu siam thar niin, hetah hian Mizo thil hlu te, hnam ropuina te, ramhmul damdawi leh Mizo pasalthate chanchinte zirlaiten Mizo tlawmngaihna leh hnam thinlung an zir chhuah theih nan telh a nih thu te, sorkar sikulah uniform inang hman tan a nih thu te, India ramah Covid vanglaia MBSE board exam offline-a kalpui thei awmchhun an nih thu te a sawi bawk.
Myanmar atanga raltlan sikul naupang 6,366, Bangladesh atangin 250 leh Manipur atangin 2,547, a vaiin zirlai 9,190 te school education hian kuangkuahin heng raltlan zirlaite hi a thlawnin uniform leh zirlaibute pawh pek an nih thu a sawi bawk.
Higher & Technical Education department kaltlanga MNF sorkar hmalakna pawh a tam hle nia sawiin, an sorkar hmasa hun lai (1998 – 2008) khan college 12-te provincialized an nih thu leh MNF sorkar lai, kum 2001 khan MZU din fel a nih thu a sawi a. MZU Southern Campus din a nih theih nan chak taka hma lain MZU pawhin DPR Rs. Vaibelche 400 chuang siamin central-ah a thawn fel a. Covid avanga sum harsatna avangin central finance ministry-in a la tifel thei rih lo niin a sawi.
National Education Policy (NEP)-in 2030 thlenga tihzawh hman tura state-te a tuk atanga zaa 70 vel hi Mizoram hian a tifel hman tawh bawk a. NEP duh dan angin Mizoramin state university hranpa a neihna tur draft bill buaipui mek a nih thu le, Zoram Medical College (ZMC) chu theihtawp chhuaha an hmalakna a zarah June 16, 2023 khan National Medical Commission-in recognition pein, ZMC atanga doctor zir chhuak 100 dawn laiin tunah hian internship an ti mek niin a sawi bawk.
L Thangmawia chuan Chief Minister Zoramthanga kaihhruai MNF sorkarah Covid avanga sum a harsa em em chungin, zirna lamah theihtawp chhuaha hmalak mek zel a nih thu a sawi a. “MNF hi Mizo hnam tana din a nih angin zirlaiten hnam thinlung pua ram leh hnam hmangaihna rilru an put theih nan theihtawp chhuah mek zel a ni a. Sorkarin theihtawp a chhuahna rah a lang tan mek a ni,” a ti.