Fur khawhnawm zual a reh tan a. Favang boruak thaw nuam a lo thleng chho tan mek. Hetih lai hian zin khawthawnte a nuam chho a. Aizawl khawpuiah pawh mihring kan chhuak vak tam tan leh ta bawk. Boruak dai leh thengthaw a chhuahvah hi a nuam bawk a. Kan khawlai pawh nidang aiin mihring lengvak kan tam tan bawk.
Hetiang kan dinhmun chhoah hian kan khawpui kawngte a thang chuang silova. Nitin mai kan khawpui traffic jam pawh ziaawm lam aiin a nasa zawngin a kal leh chho mek a. Aizawl khawpui hi kan awmdan pangngaiah pawh jam sa kan nih lai hian hunpui inher chhoah hian jam satliah loh ni kan nei leh reng mai dawn niin a lang. Kan chief minister leh ruling party ten jam lo tura min tiamna te chu kan bengah a ri nawn leh awn awn dawn a. Social mediaah ninawm khawpin kan hmu leh mek bawk. Hma lak a awm siloh chuan nakumah pawh kan la jam dawn a. Kum nga pawh vei leh se kan la jam tho ang tih hrilh lawk tur hian zawlnei nih kher a ngai lo.
Kan political party te lah chuan kan khawpui traffic a tawt em hi maw ti a, khawlai tibuai lo zawnga punkhawmna siam chu an rilru kilkhatah pawh an la dah lova. Khawpui nghawng buai vek theia punkhawmna siam chu an la inthlahrung eih lova. Traffic ti jam tura punkhawm ngei ngei kha chakna emaw an la ti tlat maite pawh hi a manganthlak khawp mai. Vanapa hall a political party ten thil tih an neih chuan mi tam tak chuan Aizawl north atanga Aizawl south pan an peih lo sa ta ringawt a. Chutiang bawkin south lam atang pawn loh theih lohah lo chuan north an pan lo bawk. Traffic jam avanga eizawnna a nghawng buai tamzia an hre duh hauh lova. Sawrkar hnathawkte chu an hlawh a tlem phah a awm lova, mimal eizawnna erawhin a tuar nasa thin a ni. Chu mai nilovin dam lo mangang emergency a damdawiin pan tur takngial pawh an tang fova. Mahse, sawi tawh ang bawkin kan hre duh eih lo a ni ber.
Kumin phei chu Mla thaln kan neih kum a ni a. Party ho an khawmpui leh nasa dawn. Khawpuia khawmpui neih hi thil awmdan tur ve reng pawh a ni a. Ei leh in châk lak pah remchang a ni bawk a. Amaherawhchu a traffic tibuai tam lo zawng hi kan political party te hian ngaihtuah se kawng a awm ang. Vanapa hall kher lo khawpui chhungah hian hmun kan nei. Mualpui lam te hi hmun a la thawl deuh a. A panna kawng pawh world bank road a nuam a. A hmun atan pawh 3rd Bn MAP ground te hi a rem em em a. Hall nise vanapa hall aia mihring leng tam fe zawk R.Dengthuama hall te pawh a awm. Motor parking a buai lova. Aizawl khawpui sawp buai fo lo hian heti zawng hian ngaihtuahna hmang hlawm se a va duhawm em. Aizawlah hian political party zawm lo, neutral kan tam a. Mipui lam pawh hian Aizawl traffic tibuai tam lutuk party apiang i vote lo ngam ang u te pawh ti hial ila a tha ang. A hêl dan kawng awm renga traffic ti jam lui duh tlat political party hian mipui an zah lo a. Mipui zah lo ram hruaitu kan mamawh lo a. Mipui tan pawh thlawp reng kan ba lo bawk ang. Party te inngaihtuah teh se.