Union Minister of State for Minority Affairs John Barla-a’n rorel lai MLA a nihna a\anga banna theh lut, Siaha bialtu MLA Dr K Beichhua chu BJP-ah a lawm lut.
Zirtawpni zan khan Zarkawta Hotel Regency-ah lawm luh inkhawm hi buatsaih a ni. John Barla chuan Mizoram chu sorkar laipuiin a duh sak em em a, fund hrang hrang hmangin vur mah se, state sorkarin hnathawhna’n tak taka a hman hi hmuh tur a vang hle niin a sawi a. State sorkar chu vote an hmuh theihna tur chauh an ngaihtuah niin a sawi.
John Barla chuan Prime Minister Modi-a kaihhruaina hnuaiah Kristian sakhaw zuitu, amah ngei pawh central minister a ni thei tih sawiin, “Ka bial chhungah Kristian sing hnih/khat chauh kan nih laiin, vote nuai 7 chuang ka hmu a, thlan tlin ka ni thei a. Chuvangin, hnam tlem zawk Minority te hi BJP chuan min ngaihsak hle a, vawiinah pawh hnam hnuaihnung anga lang leh hnam tlem zawk ten India ram hruaitu nihna chanvo pawimawh tak tak te chu kan chelh ta a ni,” a ti.
Union Minister chuan Mizoram MLA ni laiin BJP a zawm chu lawmawm a tih thu sawiin, “Vawiinah Mizoram politics a palian tak kan lawm lut a, hei lo pawh hi Mizoram politician lar, BJP zawm tur pawh an la awm zel dawn a ni,” a ti bawk.
John Barla hian, Dr K Beichhua-a bakah MNF Gen. Hqrs Adviser Lalengthanga pawh a lawm lut bawk.
Lawm luh inkhawm hi BJP Mizoram President Vanlalhmuaka’n a kaihruai a. He hunah hian Nagaland Dy CM Y Patton, Assam Dy Speaker Numal Momim, BJP National Secretary, NE Jt Co-ordinator Rituraj Sinha, Tripura State MLA te’n an tel pui a. BJP MLA Dr BD Chakma pawhin thu a sawi a ni.