Mizoram sorkarin a ram chin nia a chhal khaw 62-ah Assam sorkarin Mizo an cheng lo niin a sawi.
Mizoram sorkar chuan kumin February thla khan Assam sorkar chu lehkha thawnin Assam-in a ram chhunga awm nia a hauh khaw 62 chu Mizoram chhung ami a ni e, tiin a hriattir a, hemi chungchangah hian Assam sorkar chuan Mizoram a chhang.
Assam sorkar chuan Mizoramin a ram chin nia a chhal chhunga khaw 62-ah hian Mizo an cheng lo niin a rawn sawi a. Hei hi Assam Border Protection & Development department-in Barak phairuama district pathum bawrhsapte a hmuna enfiah tura a hriattir anga an enfiah hnua an hmuhchhuah report behchhan a nih thu Assam sorkar chuan an tar lang.
Mizoram home department official-te erawh chuan ‘heng khaw 62-te hi Mizote luah a nih vanga Mizoram chhunga mi a ni e,’ tia an hauh loh thu an sawi a. Bengal Eastern Frontier Regulations, 1873 tlawhchhana kum 1875-a British sorkar hriattirna chhuah behchhana Mizoram chhung a ni tih chu an pawm dan a nih thu an sawi.
Tripura Jampui tlangdung leh a chhehvelah te, Cachar hmun thenkhatah te Mizote luah ram zau tak a awm a, chung ram bialte chu ‘Mizoram chhunga ni e’ tiin Mizoram sorkarin a hauh lo niin official-te chuan an sawi a. Manipur tlangrama Zofate luah chin pawh sorkar chuan Mizoram chhunga awm angin a hauh lo niin an sawi bawk.
He laia Assam-in a ram chhunga a ngaih khaw 62-te hi Mizoram chhung a nihna chhan chu ‘kum 1875-a British sorkarin British ram chhung, Cachar leh Lushai ram an tih (Mizoram) inrinaa rina Lushai ram chhunga a rin luh a ni’ an ti.
‘Hetih hunlai hian helai bial hi Inner Line Forest Reserve rama puan a nih avangin mihring an awm lo niin an sawi a. Tuna lo luahtute hi Assamese an ni lo va, Mizo pawh an ni lo va, East Pakistan an tih thin, Bangladesh atanga dan kalha lo lut a luah ve ta ngawtte an ni,’ tiin Mizoram official-te chuan an sawi a ni.
Assam-in a chhan letna hi Mizoram sorkar chuan Inrinni khan an dawng a. An thawn ni pawh hi October 7 niin an ziak a. Chutih lai chuan Assam-a chanchinbu lar tak pakhat chuan he lehkha a thu awmte hi Ningani khan a rawn ziak vek tawh thung.