Lirthei hmanga eizawng pawl hrang hrang, heng Mizoram Truck Owners’ Association (MTOA), Mizoram Truck Drivers’ Association (MTDA), Mizoram Tipper Owners’ Association & Drivers Association (MTA), Mizoram Oil Tanker Drivers’ Association leh Kolasib District Drivers’ Welfare Joint Action Committee ten Sairang leh Vairengte inkar kawng chhia siam that phuta vawiin atanga lirtheite tlantir loh an tum chu an kaltlangpui dawn.
Lirthei neitu leh khalhtute hian chawlhkar kalta Ningani khan Aizawl Press Club-ah thu thar thehdarhtute an kawm a. Kawng chhe zual lai siam that a nih hma chuan October 9, 2023 zing dar 7 atangin maxi cab atanga lirthei a lian ber thlengin Vairengte leh Sairang inkar kawnga tlan loh an tum thu an sawi.
Inrinni khan hemi chungchangah Chief Minister Zoramthanga a pisaah lirthei neitute leh khalhtu pawl hrang hrang hruaitute chu kawmin kawng chhia chak zawka siam a nih theihna tura an lirtheite din rih an tum chu chief minister hian tha a tihpui thu a sawi a. Chutihrualin, kawng siam hma chu an lirtheite tlantir turin chief minister hian a ngen a ni.
Lirthei neitute leh khalhtute hian kawng a chhiat nasat avangin an lirthei tan tlan ngaihna a awm loh avangin chief minister ngenna chu zahawm ti viau mah se, lirthei tlantir loh an rel chu kaltlangpui an tum thu an sawi thung.
Hetih lai hian Chief Minister Zoramthanga hovin Inrinni tlai vek khan Mizoram PWD hotute leh Joint Action Committee for Plyable Road chuan Lailapur leh Sairang inkar kawng chhia siam that thuai dan tur ruahmanna siamin an thukhawm nghal.
Thutkhawmah hian Lailapur leh Sairang inkar kawng chhe zual lai thawm that hna tha tak leh chak zawka thawh theih a nih theih nan leh lirthei lian tlanten kawngpui siam sa an tihkhaihlak loh nan helai inkar kawngah hian vawiin (October 9, 2023) atangin lirthei lian tlan rih loh nise, kawng siam that hna thawk nghal tur hian NHIDCL lamin Seling leh Serchhip atangin truck 30 lung phur chu nimin (October 8, 2023)-ah hnathawhna tura dah tan turin an ti.
Kawng thawm that hna hi vawiin atanga chak taka hna thawh tan tum a nih thu te, kawng thawm that hna hi a chak thei ang bera thawh tum niin, lirthei lian kal theiha siam a nih veleh lirthei lian pawh tlan chhunzawm leh a nih tur thute thutkhawmah an rel a ni.
Hei bakah Teirei lei, Darlaka mi leh Bairabi Zamuanga mi thawh mek hi hna chak taka thawk chhunzawm turin PWD-in contractor-te hriattir se tih leh Tuichang leh Kawlkulh inkawng NHIDCL-in an enkawl hi siam that vat a nih theih nan DC, Khawzawlin NHIDCL leh PWD hotute kokhawmin hmalak vat dan tur relpui nise tihte an sawi ho bawk.