England midfielder Jude Bellingham-a’n a club thar tana bul a tan that chu chhunzawmin goal hnih a khung a, Osasuna lakah 4-0 in an chak.
Inrinni zanah Bellingham hian a team thar tana inkhel bul a tan vawi 10 atangin goal 10 a khung tawh a, midang goal khung tur vawi thum hetih chhung hian a siamsak.
Kum 20 mi Bellingham hian heng goal 10 hi ‘goal shot’ vawi 19 chauh atanga a khung a ni a, Real Madrid tan ralthuam pawimawh niin tlarhmaah striker a khel pahnih hnung chiahah a duh ang thala a tal thin hi an thatpui hle.
Real Madrid tan Cristiano Ronaldo-a’n match 10 chhunga goal 10 khunga bul a tan chu a tluk a, mahse Portuguese star hian assist vawi khat chauh neiin Bellingham hian a ngah zawk.
Santiago Bernabéu-ah Bellingham hian minute 9-naah goal khungin bul a tan a. Minute 54-naah a goal hnihna a khung leh a ni.Tlarhma a khel Vinicius Junior chuan an goal thumna khungin Joselu goal khung tur a siamsak leh bawk.
Real Madrid manager Carlo Ancelotti chuan, “Bellingham hian khelh theih dan tam tak min siamsak a, kan goal nawrah a pawimawh hle. Khelhna position nghet kan siamsak loh hi a tan a tangkai. A bul tan dan hi kan beisei phak a ni lova, hetiang anga goal a khung hnem hi kan ring lo.” tiin a sawi.