Vairengte leh Sairang inkar leh Kawlkulh leh Hliappui inkar kawng chhe lai siam that vat a nih theih nan sumdawnna lirthei, maxicab leh bungraw phur lirthei liante chuan he lai kawng hi nimin atang khan an zawh lo tan.
Lirthei neitu leh a khalhtu pawl hrang hrang intelkhawm, JACPR chuan Vairengte leh Sairang inkar kawng leh Kawlkulh leh Hliappui inkar kawngte chu tlanna tlaka thawm that a nih hma chuan October 9 zing dar 7 atangin zawh tawh lo an rel a, an thurel angin maxicab leh a chung lam lirthei liante chu nimin zing atang khan he kawngah hian an tlan lo tan a, he kawng hi zawh lui an awm loh nan pawl hrang hrang member-te chu hmun rukah an duty a ni.
Zawhna chhangin JACPR hruaitute chuan Vairengte leh Sairang inkar kawngah hian lirthei lian tlan luih tum, dan ngai an awm lo tih an sawi a, Aizawl atanga Assam lam pan tur hnam dang lirtheite pawh he kawng hi zawh lo tura an lo hriattir zel thu an sawi.
JACPR hruaitute chuan nimin chhun khan Kawnpui leh Sairang inkar kawng chhe zual siam mek an tlawh a, sorkarin kawng siam tha tura hma a laknate an enfiah thu an sawi a, tun ang zela hmalakna a kal chak a nih chuan kawng chhe lai chu lirthei zawh tlaka siam that vat an beisei tih an sawi.
Lirthei neitu leh a khalhtu pawl hrang hrangin kawng chhe lai siam phuta mihring mamawh phur lirthei tlantir loh an tum thu an puan hnu khan sorkar chuan kawng siam that chungchang hi bawhzuiin Mizoram PWD leh NHIDCL hotute chuan kawng siam mek chu an endik nghal a, hemi hnu Inrinni khan Chief Minister Zoramthanga leh JACPR hruaitute chu an inkawm a, Lailapur atanga Sairang inkar kawng siam that thuai dan turte chu an ruahman a, nimin atang khan kawng chhe lai siam that hna hi ngawrh takin thawh a ni ta a ni.