Aizawl : MPCC Treasurer Dr Lalmalsawma Nghaka chuan PWD, PHE leh Power Department hotute hnenah Aizawl South-II huamchhung mamawh te a thlen.
Dr. Lalmalsawma Nghaka chuan he’ng department-a Engineer in chief theuhte a hmu a. An hmalakna avanga mipui nihlawhna leh hmasawnna kawng hrang hrang hmuh theiha awm chu nasa taka tan an lakna leh thawhrimna vang a ni tiin, lawmawm a tih thu a sawi.
MPCC Treasurer chuan PHE department hotute hnenah kuminah kum dang aiin ruahtui a tlak tlem avangin ruahtui ringa innghat chhungkaw tam takin tui lama harsatna an tawh an hlauhthawn thu te, Kristiante hunpui lo thleng tur atan mipuiten harsatna an tawh lohna tura ruahmanna fel zawk siam lawk sak theih a nih dan tur te a thlen a ni.
PWD hotute hnenah veng chhung inkawl pawhna kawngah pawh hmasawnna tam tak hmuh tur a awm tih sawiin, tunah hian hmanhmawh zawka thawm that leh chei that ngai erawh tih thuai ni thei se a duh thute a thlen bakah, Kristiante hunpuiah mipui te’n an hnathawhna kawnga Power supply lama harsatna an tawh lohna tura ruahmanna siam dan tur te Power & Electricity Department hotute hnenah a thlen bawk.
Dr. Lalmalsawma Nghaka chuan department hotute chu theihtawpa thawhhona tha nena thawhho puiah sawmin, a theihna kawng apiangah amah pawhin hma a lo lak ve zel tur thu a sawi a ni.