October 13, 2023 thleng neih tura Mizoram Florists’ Association (MFA)-in Aijal Club Park-a Florists Fair an buatsaih chu nimin khan MJA Gen. Hqrs President, C Lalrambuatsaiha’n a hawng.
Florists fair hawngtu MJA president chuan khawvel thil mawite ngaihtuah apiangin rilruah pangpar a lang thin tih a sawi a. Khawvel ram changkang leh hmasawn tawhte hian pangpar an ngaihlu thin hle nia sawiin, “Pangpar hi khualzin hipna atan a tha em em a, pangpar hi tourist industry mai ni tawh lovin, industry pakhat a ni tawh,” a ti.
C Lalrambuatsaiha chuan Mizoramah pawh pangpar man a to avangin eizawnna tling tak a ni tawh tih a sawi a. “Nu hoin hmasawnna rahbi thar in ti zel hi a lawmawm a, uar deuh deuh a, tang zual zel a, khawvela pangpar mawi ber berte chaw lut a, kan ram tipar vul mawi zel turin duhsakna ka hlan a che u,” a ti bawk.
Florists fair hawnna inkhawm hi MFA Treasurer Lallawmchhungi’n a kaihruai a. MJA president hi MJA Gen. Hqrs Treasurer C Lalhmachhuana leh member eng emaw zatin an tawiawm a ni.
Tun tuma florists fair-ah hian dawr 70 vel hawn niin, pangpar potted, pangpar tiak, pot, leitha, thlai tiak, pangpar tiak leh pangpar kaihhnawih chi hrang hrang zawrh a ni a. October 13, 2023 thleng neih tur a ni a, tlawh turin MFA chuan mi zawng zawng an sawm.
Kum 1999 atang khan MFA hian flower show leh fair hi kum tin an buatsaih a. A chang chuan kum khatah vawi li-te pawh an buatsaih thin a. Show/fair an buatsaihin sorkar department leh mi dangten an sponsor thin a, tun tumah hian horticulture department-in an sponsor a ni.