Aizawl: Economics & Statistics department chuan nimin khan an kum 50-na, golden jubilee chu an department office Conference Hall-ah an lawm a, Chief Secretary Dr. Renu Sharma-i’n a hmanpui.
Khuallian chuan Jubilee hriatrengna lungphun a hawn bakah Statistical Handbook Mizoram, 2022 leh Meteorological Data of Mizoram, 2022 chu a tlangzarh nghal bawk.
Jubilee lawmna inkhawm neih chhunzawmah thu sawiin Dr. Renu chuan Economics & Statistics Department chu statistics leh a kaihhnawih zawng zawngah ‘nodal agency’ an nih avangin tan la zel turin thawktute a fuih a, “Statistics tha chuan hmasawn nana ruahmanna (developmental planning) atan leh hma lam atana policy siam nante a pui nasa em em a, data tha leh dik tel loin hmasawnna hian kawng dik a zawh mumal thei lo hial ang,” a ti.
Economics & Statistics department hi March 1, 1973-ah office hran, enkawltu hran neiin kalpui tan a ni a, state chhunga official statistics leh data-te vawng thatu an ni a. August 19, 2008 atang phei chuan state chhunga statistics leh a kaihhnawih hna reng rengah NODAL AGENCY atan Directorate of Economics & Statistics hi Mizoram sorkar chuan a puang ta a ni.
Golden Jubilee lawmna inkhawm hi Planning Secretary Lalmalsawma Pachuau chuan kaihruaiin Director B. Lalrinhlua’n thu a sawi bakah Deputy Director B. Vanlalruati’n ‘One State One Statistics – Its Relevance & Way Ahead’ tih thupuia hmangin presentation a pe a ni.