Aizawl: Mizoram People Forum (MPF) chuan Mizorama MLA inthlana vote tlate chhiar ni atan Inrinni leh Pathianni ni lo ni dang ruat tha turin Election Commission of India (ECI)-ah ngenna thlen an tum.
Nimina Mission Veng Presbyterian Kohhran Hall-a Annual General Meeting vawi 16-na an neihah ECI-in vote chhiar ni atana Pathianni a ruat chungchang hi an sawi ho a, Kristian state tih theih khawpa Mizote zaa za Kristian awmnaah Pathianni chu ni serh, Pathian biakna ni a nih avangin vote chhiar ni atana hman chu remchang lo an ti a, vote chhiar ni atan hian Inrinni leh Pathianni ni lo ni dang ruat tha leh turin ECI-ah ngen nise an ti.
MPF General Meeting chawhma hun hi an president, Rev Dr C. Chawnghmingliana’n a kaihruai a, Gen. Secretary Rev Lalramliana Pachuau chuan annual report pein, kum 2024-2025 chhunga MPF budget atan Rs 14,03,000 an pawm.
Annual General Meeting-ah hian thupui pahnih, ‘MPF kalphung leh hma lak dan tur’ tih, Upa Lalramthanga ziak leh ‘Huapzo sorkar kan mamawh’ tih, Rev K. Lalrinmawia ziahte zirho a ni bawk.