Aizawl: Assembly Speaker Lalrinliana Sailo chuan nimin khan speaker leh MLA a nihna atanga bânna a thehlut a, BJP-ah lawm luh a ni dawn a; Mizoram khawthlang lamah din tumin ruahmanna an nei.
Rinliana hian speaker leh MLA a nihna atanga bânna hi nimin chawhnu dar 2:30 bawr vel khan Assembly Deputy Speaker H Biakzauva hnenah a theh lut a, a bânna lehkha hi Assembly Commissioner & Secretary Lalhmahruaia Zote-in a dawng a ni.
Bânna a theh luh zawha chanchinbu miten an kawmnaah Mizoram sorkar sum leh pai dinhmun chu a chhiat em avangin ramin central sorkar tanpuina a mamawh hle tih sawiin, hemi avang hian Mizoram chhanchhuah nan central sorkar thian ni turin tuna a awmna atangin a bâng ta tih a sawi.
Rina Sailo chuan BJP zawm tuma an hruaitute nen inbiakna an neihah health minister a nih laia an hmalakna rah chhuah, Zoram Medical College chu central kuta lak an tiam a, hei hi BJP luhpui tham a nih thu sawiin, hei bakah Mamit dictrict chhunga kuhva chingtuten harsatna an tawh loh nan BJP hruaitute chuan hmalak an tiam thute a sawi.
A bial, Chalfilhah din leh a tum leh tum loh zawhna chhangin Rina Sailo chuan, “Ka bial ngai atang chuan din ka tum lo a, khawthlang lamah khuan chance awmin kan hria,” a ti.
Kumin MLA inthlanpui neih turah rorel lai, MNF-in sorkarna an chan nawn a rin loh thu a sawi a, zawlnei Pathian miten sorkar leh turin MNF an sawi lo a, Pathianin a mite a tihmualpho a rin loh thu a sawi.
MLA inthlanpui neihah BJP tel loin sorkarna a din a rin loh thu a sawi a, “Ka rin dan chua BJP in MLA panga atanga pariat chu a neih ngei ka ring a, deciding factor chu a nih ngei ka ring,” a ti.
Thudawn danin Rina Sailo hi vawiin tlaiah BJP State Office, Upper Republic-ah lawm luh a ni dawn a, lawm luh inkhawm hmang turin central-a BJP hruaitu lawkte Mizoramah an zin dawn a ni.
Rinliana Sailo hi Congress party-a awm thin a ni a, Congress sorkarah minister a lo ni tawh thin a. Kum 2018 inthlanpui neih dawn khan MNF party zawmin MNF ticketin Chalfilh bialah thlan tlin a ni a, assembly speaker nihna chelhin, a bial ngaiah MNF ticket-a ding leh tura ngaih a nih laiin he bialah hian mi dang dahin, ticket a chang ta lo a; MNF party chhuahsanin BJP a zawm dawn ta a ni.