Aizawl: Mizorama NGO leh political party ten Mizorama MLA inthlanpui vote chhiar ni atana Pathianni ruat chu an duh lo a, Pathianni leh Inrinni ni lo, ni dang ruat turin Election Commission of India (ECI)-ah ngen an tum.
Nimin khan Central YMA huaihawtin Central YMA Committee Room-ah NGO leh political party-te thukhawmin Mizoram state Legislative Assembly inthlan vote chhiar ni atana Pathianni ruat a nih chungchang an sawi ho a ni.
NGO leh party hruaitute thukhawm chuan ECI-in vote chhiar ni atana a ruat, December 3 chu Kristiante ni serh leh Pathian biakna ni a nih avangin hemi nia vote chhiar chu a remchan loh thu leh Pathianni leh Inrinni tih loh ni dang ruat zawk tura ECI hnena ziaka thlen an rel a ni.
ECI hnena lehkha thawn turah hian NGO leh political party tin president-in hming ziah nise an ti a. A lehkha copy hi Chief Electoral Officer (CEO), Mizoram pek ve pahin sawipui nise an ti a, ECI-in an ngenna a tihhlawhtling lova Pathianni hi a titlang dawn a nih chuan a tul anga hmalak dan tur ngaihtuah leh nise, an ti bawk.
He thutkhawmah hian NGO hrang hrang – CYMA, MUP, MHIP, MZP, MSU leh Political party hrang hrang – AAP, BJP, INC, MNF, ZPM leh ZNP aiawh mi pahnih theuh an tel a ni.