Sumdawnna lirthei neitu leh a khalhtu pawl intelkhawmna, Joint Action Committee (JAC) for Plyable Road chuan kawng chhiat avanga an lirtheite Vairengte leh Sairang inkara ni hnih tlantir loa an duty hnuah nimin atangin duty an titawp.
JAC chuan nimin khan thuchhuah siamin an duty an tihtawp chhan an sawifiah a, kawng chhe lai siam that vat a nih theih nana lirthei tlan turte dangtu, Kolasib leh Vairengte lama tlawmngaia duty-te chu sawrkar thuneitu, Kolasib DC leh SP-ten duty titawp tura an nawr thu an sawi.
Sorkar thuneitute thu zawm mai tha an tih avangin duty thei an ni ta lo tih sawiin, an duh dan hrethiam ve pha lo state dang motor liante an lo lut thei vek tawh tih leh pawi an tih thu an sawi a, hmun danga an duty-te pawh tulin an hre tawh lo tih leh duty an titawp tih an sawi.
JAC for Plyble Road chuan kawng tha a awm theih nan an motor liante din riha hna chak zawk leh tha zawka thawh a nih theih nan tiin an eizawnna khaihlak pawh huamin, kawng siam turin sorkar an ngen thu an sawi a, chief minister pawhin pawmpuiin chak zawka siam a nih thei nan thawhho tha a tih thu an tar lang a, PWD leh NHIDCL lamte hma chak tak a la tura a hrilh chu CM chungah an lawm takzet tih an sawi.
Kawng chhe lai siam that thuai a nih theih nana an hmalakna thlawptu mipuite chungah lawmthu an sawi a, kawng tha an nei thei loa motor lian an tlan theih loh chuan mawh an phur lo tih an sawi bawk a ni.