English football club Birmingham City chuan Wayne Rooney chu an manager thar atan an lalut.

Kum 37 mi England captain hlui hian Championship a khel mek club hnenah hian kum thum leh a chanve contract a ziak.

Rooney hian Blues head coach John Eustace chu a thlak dawn a, Thawhtanni khan thla 15 a enkawl hnuah Eustace hi club lamin an chhuahtir.

Manchester United striker hlui hi Birmingham City club neitu thar American company Shelby Companies Limited in July thla a club an lei fel hnua manager an thlak hmasak berna ni tura an lakluh a ni.

Rooney hi a hna tharah hian England tana a khelhpui thin leh ngland Under-21 assistant ni lai Ashley Cole chuan a pui dawn a, ani bakah Manchester United a a khelhpui thin, tuna Republic of Ireland men’s national team assistant coach ni lai John O’Shea pawh a coaching staff-ah a tel ang.

Anni pahnih bakah hian Carl Robinson leh Pete Shuttleworth te pawhin Rooney coaching staff hi an zawm dawn a, anni hi DC United a Rooney coaching staff a awm tawhte an ni.

Chiang zawkin

Rooney hnuaiah hian Birmingham City hian October 21-ah Middlebrough an hmachhawn dawn a, hei hi an inkhel a enkawl hmasak ber a ni ang. Blues hi league-ah parukna ni mekin season bul tan tha lo Michael Carrick-a pawlte hi a zawna vawi li chak lai an ni a, fiahna lian an tling dawn.

Everton a chawr chhuak striker hian manager hna a thawh vawi thumna tur a ni a. Major League Soccer club DC United bakah Derby County te a lo enkawl tawh.

Blues co-owner leh chairman Tom Wagner chuan, “Wayne hi hlawhtling thin a ni. A coaching staff te nen, club leh club tantute tanrualna nen chuan Blues hi hmalam thui taka min panpuitu a nih theih hi kan ring tlat.”

“A football khelh duhdan kan hria a, hei hian Birmingham City in hlawhtlin tumna a neih kawngah thui takin min pui dawn.”

“He zinkawng zawh tura a inbuatsaihna hi a rei tawh a, Manchester United a a khelhlai atang tawhin coach tha nih a inzir a, a tana huntha chu a inhawng chiah a ni.” tiin a sawi.

Eng nge a hmabak?

Birmingham City hi EFL Championship a khel rei tawh club zingah an tel a. Kum 2011 a Premier League atanga an tlak hnuah an la kaisang leh lo.

He club hian kum 2011 vêk hian Arsenal chu League Cup final-ah an hneh a, West Midlands club zinga trophy chawi hnuhnung ber an ni.

Nimahsela tunhnai kum 13 Championship a an hman tawh atangin an tlak thlak hlim a 2011-12 season a play-offs an khelh bak Premier League kaisan leh an hnaih lo.

Tun season-ah parukna an ni mek a, nimahsela point 10 in kaisan nghal theihna dinhmun an hlat mek. Hetihlai hian kum 2014 leh 2017 khan League One lama tlak thlak hlauhawmah an awm hman ve tawh bawk.