Aizawl: MNF President, Chief Minister Zoramthanga chuan ramin harsatna a tawh avanga mipui beisei ang an phak lohnaah mipui hriatthiamna dilin, ngaihdam an ngaihnaah ngaidam turin mipui a ngen.
Saikuti Hall-a nimina MNF Sub-Headquarters, Lunglei Special Conference a hmanpui a, mi thar lawm luh leh election campaign kick off a hmanpuinaah MNF President Zoramthanga chuan Lunglei district huam chhung assembly constituency paruka MNF official candidate-te chu MNF Party Nomination Committee-in uluk taka an ngaihtuah hnuah lungsi taka an pawm tlan a nih thu a sawi a. MNF candidate-te boruak a kân zual zel thu sawiin, Lunglei district mipuite chu MNF official candidate-te lo vote tling ngei turin a ngen.
Zoramthanga chuan Lunglei kalkawng siam nan SASCI leh department sum dah tawh atanga thawh tan ni mah se, fur a rei deuh avangin tum anga hna thawh a harsat thu a sawi a, mipui hriatthiamna a dil nghal a; khua a hul deuh hunah chak takin sum dah tawh hmanga hna thawh chhunzawm a nih tur thu a sawi bawk.
Chief minister chuan Mizoramin harsatna namen lo a tawh avangin sorkar sum leh pai dinhmunin a tawrh nasat thu leh dam khawchhuahna tura beih a ngaih avangin sorkarin a tum ang taka hna a thawh hleihtheih loh karah pawh ram development hnathawh erawh an thulh chuang lo va. Hetiang harsatna tawk chunga ram hmasawnna hna an la thawk reng thei hi Pathian tanpuina leh malsawmna a nih thu sawiin, “Ramin harsatna a tawh avanga mipui beisei ang kan phak lohnaah mipui hriatthiamna kan dil a, ngaihdam dil kan ngaihnaah min lo ngaidam ang che u,” a ti.