Aizawl: ZPM President Lalliansawta’n Mizoram State Assembly inthlanpui neih tura an party chhinchhiahna (symbol) atana hman tur lukhumparh (hat) chu nimin khan a tlangzarh.
ZPM party pisa-a tlangzarh inkhawmah ZPM President Lalliansawta chuan ZPM hi registered unrecognise party an la nih avangin kumin inthlanpui turah pawh chhinchhiahna tlangzarh a ngai a. Nilaini zan khan an chhinchhiahna tur chu Election Commission of India atangin pawmpui an hmu fel thei chauh tih a sawi.
Lalliansawta chuan, “Kan duhthusam angin hmu hma thei lo mah ila, a hun takah chhinchhiahna (symbol) kan nei thei ta hi a lawmawm hle a ni,” tia sawiin, ZPM chu Zoram mipuite kalphung thar mipui sorkar siampui atan a sawm nghal bawk.
Tlangzarh inkhawm hi ZPM Working President K Sapdanga’n a kaihruai a ni.