Aizawl: Joel Joseph Denga, District & Sessions Judge, Aizawl Judicial District chuan Aizawl District Court-ah Probation Officer’s Office leh Children’s Room te chu khuallian niin a hawng.
Office hawn thar pahnihte hi Aizawl District Court-a naupang, hursualna tuartute leh naupang, an nuten lung in an tanpuite leh naupang, chhan hrang hrang avanga court-a inlan leh kal ngaite tana hawn a ni.
Dr HTC Lalrinchhana, Special Judge, PC Act, kaihhruai hawnna inkhawmah khuallian Joel Joseph Denga chuan naupang, hursualna tuartuten court-a harsatna an tawh thin tihtawp a nih theihna turin hetiang hmunhma hi mamawhna a san viau thu a sawi a. District court zawng zawngah pawh siam zel a nih theihna turin Mizoram State Commission for Protection of Child Rights (MSCPCR) chuan hma la zel thei se a duh thu a sawi.
Joel Joseph Denga chuan court building leh a chheh velah naupang khuaikhem leh pawngsualtua puhte leh a tuartute chu a hring a hrana inhmuh palh theihna remchang a awm thin avangin a tuartu naupangte chuan court-a evidence pek chungchangah te harsatna an tawk zui thin thu a sawi a. Rilru lamah pawh harsatna an tawh phah thin avangin a tuartu naupangte chu tha taka zawhnate an chhan theih nana lo fuih a, huaisenna an neih theihna tura lo buatsaih a tul thu a sawi a. Mizoramah POCSO Victims Compensation pawh sorkar sum harsatna avangin la pek loh tam tak an la awm thu a sawi bawk.
MSCPCR Chairperson Dr C Lalsangzuala pawhin naupang, hursualna tuartute leh naupang, an nuten lung ina an tanpuite leh chhan hrang hrang avanga court-a inlan ngai naupangte tana office leh room te hi siam an nih thu a sawi a ni.