Aizawl Municpal Corporation (AMC) huam chhunga ZPM party candidate thalai mi panga te’n Sustainable Development & Reforms Policy (SDRP) an kalpuina tura hmachhawp thenkhatte sawi fiahin, he policy hmangin state intodelh, corruption nekchepna leh mi taimate dinchhuahna ram an siam thei niin an sawi.
Nimin khan Aizawl Press Club-ah thu thar thehdarhtute an kawmnaah, Mizoramin Hydro electric power 4,000MW vel siam chhuak theih a nih laia, zaa 7 chauh an la siam chhuak thei te, bairabi Hydel project 80MW siam theihna a zuzi ta te, Tuirial HP 60 MW siam theihna to taka lei a nih tak dante leh Tuivai HP, 210 MW siam chhuah theihna zuzi leh lek lek te chu hriat hrehawm an tih thu sawiin, “Kawlphetha-a intodelh theih nan hma kan dawn,” an ti.
Kawlphetha chhit man pek loh avanga state danin power cut sak tura vauna state in a tawk fo mai te chu pawi an tih thu an sawi a. Kawlphetha-a intodelh ve theihna tur, Ministry of Finance in Viability Gap Funding hmanga Rs.1,700 Cr senna tur Tuivai Hydel Project, 210 MW atana ‘In-Principle Approval’ a pek tawh, a buaipuitu turin a ngaihsak loh leh hun pek belh a dil loh avanga an phalna hnuh kir a nih chhan pawh MNF party chu thil kal dik tak sawi a, mipui hmaah insawifiah turin an phut bawk.
Lirthei kaihhnawiha eizawngte hamthatna tur Bill an pu lut leh dawn tih sawiin, “ZPM MLA Dr. Vanlalthlana’n ‘The Private Transport Workers (Welfare) Bill, 2022’ a put luh atang khan lirthei eizawngte khaikan kawngah nasa taka hma lak kan tum tih a chiang a. He bill ngaihtuah a nih laia, kan CM lehzelin lirthei eizawngte diriamna tawngkam a hmang kha pawi kan ti hle,” an ti.
Lirtheia eizawngte chu accident tawk thut thei dinhmuna awm, chhungte chhuahsan ngai reng leh lirthei khu kara eizawng an nih avangin ngaihsak ngai an ni tih an sawi a. ‘Labour Cess’ hmanga hamthatna an dawn ve theih loh avangin lirthei eizawngte hamthatna tura sum mamawh chu VAT on POL (Petrol – 25%; Diesel – 14.5%) atanga ngaihtuah sak theih a nih thu leh, Consolidated Fund atang pawhin a pek theih thu an sawi.
Lirtheia eizawngte harsatna chi hrang hrang – pollution test, permit replacement, bus terminal, special road permit leh thil dangte pawh Association hruaitute nena inberemin chinfel dan ngaihtuah sak an nih tur thu an sawi bawk.
ZPM in Bana kaih (Hand Holding) policy hmangin din chhuah duhte chu a tanpui dawn tih sawiin, “A taima apiangte tana dinkhawchhuahna tur siam a ni ang a. Mizoram-a chengte hi kan thatchhe hran lo va, taimakin awmzia a neih thin loh avangin hmalak ngaihna kan hre lo mai a ni,” tia sawiin, Bana kaih policy chu industry, agriculture, horticulture, sericulture, handloom & handicrafts, services sector leh thil siamna dangah hman a nih tur thu an sawi.
ZPM party an sorkar chuan zirna leh infiamna lama mi taimate tan awmze nei zawka zirna kalpui a nih dawn bakah, Sports Promotional Fund lam ngaihven nasat lehzual a ni dawn tih an sawi bawk.
He hunah hian Aizawl North II candidate Vanlalthlana, Aizawl South III candidate Baryl Vanneihsangi leh Aizawl West II ZPM candidate Lalnghinglova Hmar bakah, Aizawl West I ZPM candidate TBC Lalvenchhunga te an tel a ni.