Manchester United chuan an player thunun mek Jadon Sancho chu hralh an phal a, January thla hian a nghet a a chhuah theihna turin amah chungchanga dawrtute tan an inhawng.
English forward hi September thla a Arsenal nen an inkhelh zawh atangin squad thiltihnaah telh a ni lova. Manager Erik ten Hag-a’n training a nei tha tawk lo nia a sawi chu Sancho hian chhangletin a chungchangah thudik tawk lo an sawi niin a sawi ve thung.
Player leh manager-te inkar hian sawi zui a hlawh viau a, Sancho hi manager lakah leh club lakah thupha chawi tura tih a nih hnuah a duh lova. Hei vang hian first team training-ah telh ni lovin first team kiangah hun hman tir a ni lova. Ngaihdam a dil loh chuan first team training-ah laklet a ni dawn lo tih hriattir a ni tawh.
- Hralh an phal
United hian an squad-ah hliam avangin harsatna tawk mek mahse an team boruak tichhe thei tur ang chu chhuahtir an phal a. January thla hian a nghet a hralh an tum.
British chanchinbu thenkhat sawidanin United hian kum 2021 a Pound maktaduai 73 a an lakluh player hi beisei anga a khelh that loh avangin a hlutna hi a zahve velin a tlahniam tawh a, heti chung hian United in man tlawm zawka an squad atanga chhuahtir hirm hrim an duh niin an sawi.
Sancho hian ngaihventu a neih zingah a club hlui Borussia Dortmund an tel a, Barcelona leh Juventus te pawh sawirik an nihlaiin anni pahnih hian lei ngheh aiin loan a hawh an duh zawk.
- Engtin zel?
Kum 23 mi Sancho hi a club hlui Dortmund-ah dahsan a la ni hle nia ngaih a ni bawk a. Mahse Dortmund atang hian sawmna lian tham tak a hmu a nih loh chuan United-ah a hlawh tam avangin Germany pan a duh kher dawn lo nia sawi a lo ni tawh.
Dortmund hian sum tam tak senga lakluh ngheh aiin loan a hawh phawt chu an duhdan a ni dawn niin chanchinbuten an sawi a, hei bakah hian kar khat a Pound 300,000 a hlawh chu United in a then an pek pui an beisei bawk.
United lamin man to taka an hralh thei dawn lo a nih pawhin an team-ah Sancho awm lo se an duh zawk nia a lan avangin club pahnihte an indawr chuan inremna an nei mai thei turin mi tam takin an ngai.
Hetihlai hian Sancho hi United team a a thian hnaite chuan ngaihdam dil a squad a tel leh turin an ti nia sawi a lo ni tawh.