United Kingdom-a thlawhna tumhmun lun ber pakhat, Gatwick chu ralkhat atanga khalh chi thlawhna tê (drone) hmanga beih a nih avangin an buai hle a, nizan hmasa atanga nimin tlai thleng khan thlawhna lut leh chhuak a awm thei lo va, khualzin sing chuang an tangkhang mek.
Gatwick-ah hian Nilaini zan khan a hungna khumin thil thlawk thei a thlawh luh avangin a tumkawng (runway) hi dar 9:00 (India-ah nimin zing dar 2:30) khan khar a ni a. Airport chuan darkar eng emaw zat hnuah man theih a ni a, dar 3:01 (India-a nimin zing dar 8:31) khan hawn leh a ni a; mahse, a dang a thlawh leh avangin a him tawk lo nia hriat a ni a, nimin tlai thleng khan an la khar.
Thlawhna 760-a khualzin 110,000 chuang chu nimina thlawk tur kha niin an che thei lo va. Gatwick chief operating officer Chris Woodroofe chuan heti zat zet khualzin leh thlawhna a chet theih loh avang hian a pangngai anga kal leh tur chuan ni eng emaw zat a ngaih tur thu a sawi.
Mi tam tak chuan buaina a awm tih an hriat avang hian an thlawh theih hun tur ngaichangin tumhmun hi an pan a, hetih lai hian Easyjet chuan an thlawhna thlawh tur thulhtir vek an nih avangin a chuang turte chu Gatwick pan lo law law turin an hrilh.
Sussex Police chuan tumhmuna drone inlar hi firfiaka chetna lam a nih loh thu leh tuten emaw tihbuai tum hrim hrima an chetna a nih thu an sawi a. University of Kent-a mi, Dr. Alan McKenna chuan drone hi vantlangin dawr atanga an lei mai theih loh ang chi, ‘industrial size’ an tih ang chi a nih thu a sawi.