Aizawl : MPCC President Lalsawta chuan, tun hnaia Hindu, Muslim leh sakhaw hrang hrang kal duh dan ngaihtuah hian, Kristian chu an danglam ngam a ngai a, duhthlanna hman thiam a tul tih a sawi.
Zirtawpnia Congress party in an pisa-a Political Session an hmanah Lalsawta chuan, ram dinhmun uluk taka ngaihtuahin, tun boruak anga duhthlanna hman thiam a tul hun hi a awm lova a hriat thu sawiin, “Hindu, Muslim leh sakhaw hrang hrang kal duh dan han ngaihtuah hian Kristian chu kan danglam ngam a ngai ta a ni. Chuvangin, MLA General Election 2023-ah pawh hian duhthlanna dik hmanga ram siam hi mipui hian kan thei a ni tih hriain, Congress party thlawp turin ka sawm a che u,” a ti.
Mizoram BJP te chu anmahnia ding chhuak a, sorkarna siam turin Mizo mipuiin an ring lo tih sawiin Lalsawta chuan, “An ni hi kan beih ber pawh an ni lo. Central BJP leh RSS-in Mizoram luhka a hman a tum hi chu Regional party te an ni,” a ti.
Lalsawta chuan, BJP hian tunah pawh MNF an thawhpui tih hriat vek ni mah se, MNF hi mipuiin an hnawl a, an pawm tawh si loh avangin, mipui ina an la hnawl loh ZPM hi thawhpui tumin thiam takin hma an rawn la mek zawk niin a sawi a. Kristian anga tanrual a hun takzet tih a sawi.
He hunah hian MPCC President Lalsawta’n an party-ah Dr LH Chhuanawma a lawm lut nghal bawk.