Aizawl Mihlun Thlahte chuan, Aizawla piang leh seilian zinga kum upa, kum 90 chin chung lamte hlutpuina programme an kalpui mekah, tun hnaia kum 90 tling thar mi pathum hnenah hlutpuina thuziak nimin khan an hlan.
Hlutpuina thuziak an hlan mi pathum te chu Neihthangi, Zote Bakery; Sailothangi Sailo, Zarkawt leh K. Lalchhuana, Kulikawn te an ni.
Aizawl Mihlun Thlahte chuan kum lama upa te chu hnam rohlu an nih avangte, hmasang atangin kum upa te zahna lantir chu Mizo khawtlang nuna bet tlat anih avang te, kum upa te chunga zahna lantir leh chawimawi chu chhawm nun zel tula an hriat avangte leh thangtharte pawhin an lo hriat zawm zel nan tiin kum upa te hlutpuina hun hi buatsaih anih thu an sawi.
Aizawl Mihlun Thlahte tar lan danin, tun dinhmunah Aizawla piang leh seilian, kum 90 chin chung lam mi 20 an awm mek a, an zinga upa ber chu kum 108 mi, Khatla venga khawsa mek Buangi a ni.