MNF Party President Zoramthanga, chief minister chuan MLA inthlanpui neih turah a bial ngai Aizawl East I biala ding leh turin hming a pe lut a, sorkarna an siam leh ngei a rin thu leh bial 25 chung lam an lak a rin thu a sawi.
Zorama hian nimin chawhma dar 11 khan Aizawl East I bial Returning Officer Saizikpuii, Addl. DC Aizawl hnenah nomination paper a theh lut a, hemi hnua thuthar thehdarhtute’n an kawmnaah zawhna chhangin Zorama chuan East I mipuiin an thlan tlin ngei a rin thu sawiin, “Kan huphurh lo khawp mai a, inthlan hmasaka ka chakna vote ai khan tun tum inthlanah ka chakna a san zawk ka ring,” a ti.
Ram pumah pawh sorkarna an chan leh ngei a ringa bial 25 aia tam an lak a rin thu a sawi a. Covid-19 leng avanga harsatna karah ram leh mipui tana an hnathawh chu mipuii tha an ti nia an hriat thu sawiin, hemi avang hian an hmachhawpte hlen chhuak tura an sorkar leh ngei a beisei thu a sawi.
Thuthar thehdarhtuten Congress party hruaitu, Rahul Gandhi-a’n MNF leh ZPM chu Mizorama RSS luhna kal kawnga a puhna chungchang zawhna chhangin Pu Zorama chuan, RSS nen inzawmna an neih loh thu a sawi bawk a ni.