Mizo Zirlai Pawl bultumin nimin khan hnam dang pasal nei MLA candidate duh loh lantir nan Aizawlah ‘Hnam humhim kawngzawh’ huaihawt a ni a, MZP President H. Lalthianghlima’n hnam dang pasal nei MLA candidate tlin loh nan ke an pen chhunzawm zel dawn tih a sawi.
Kawng zawh hi chawhma dar 11 atangin Zarkawt kawn atanga tanin Vanapa Hall kawt thleng an zawh a, kawng zawhnaah hian Aizawl chhunga college hrang hrang atangin zirlai mi sang chuang an tel a ni.
Hun tawp an hmannaah hian MZP president chuan thu sawiin, MLA election lo awm turah hnam dang pasal nei candidate a dah lo turin vawi tam tak party tinte an ngen a, ram leh hnam tana an ngenna zawmsak party an awm laia Congress Party-in hnam dang pasal nei, Meriam L. Hrangchal an dah lui chu pawi an tih thu sawiin, hnam dangten an nupuite hmanga Mizoram rorêlna sang ber an luhchhuah chu an remti ngai dawn lo tih te, hnam dang pasal nei MLA candidate-te an tlin loh nan ke an pen chhunzawm zel dawn tih a sawi a; “Mizo hnam hi thisenah a nih avangin hnam dang, Mizorama an awm rei tawh avanga Mizo-a pawm chi an ni lo,” a ti bawk.
Hnam dang pasal nei MLA candidate duh lohtu zirlai pungkhawmte chuan resolution pathum pawmin Mizoram rorêlna sang ber, Assembly House-a thu turin hnam dang pasal nei kan duh lo, tih te, hnam dang pasal nei MLA candidate-te hi hnawla vote lo turin Mizo mipuite kan ngen tih leh Mizoram leh hnam humhim a nih zel theih nan a tawp thlengin ke kan pen zel ang, tih te a ni.