- Dr. C. Lalrampana
Kal (kidney) hi mihring taksa peng pawimawh tak pum chhung dinglam leh veilama awm hnathawh pawimawh tak nei a ni a, a tel lo chuan mihring a dam khawchhuak thei lo.
Kal hian thisen a thlifim a, bawlhhlawh paihchhuakin zunkawngah a pechhawng a, thisen thlifimin thisena tui bawlhlawh leh chemical-te a paih chhuak thin a, chu chu zunkawng pipe (tube) chuan kal lai tak ve ve renal pelvis an tihah chuan vuah zawmin phingah a lo dawng khawm a, pawnah a paih chhiakleh thin a ni.
Kal hian thisen kal blood circulation mumal takin a siam a, red blood cells chu mumal takin hna a hawhtir thin a ni, Kal natna hi tui thianghlim lo in atang leh ei leh in fimkhur tãwk lohna leh thil dang tam tak avangin a awm thei a.
Chuvangin, kala lungte awm thinte pawh hi kal chak tawk loh avanga hna a thawh that theih loh vangin thisena bawlhhlawh thlifim tha thei lovin a lo awm a, chung bawlhhlawhte chu inhlawmkhawmin lung ang maia changin a lo sak a, a len deuh phei chuan zunkawngin Kal a rawn zawmnaah a hnawh thin emaw zunkawngah a tang/tangkhang a, chu chuan phinga pawh thla zelin zun dawt atanga engthawl taka zun lo luang chhuak tur chu a dal a, chuvangin, Zunin a siam a, mihringin nasa takin a tuar thin a ni.
Chuvangin, kal hi uluk taka enkawl a ngai a, conventional medicine (vai damdawi) nghawng tha lo tam tak nei ei vak vak ai chuan mahni in lama damdawi ei mai theih (nature’s remedy) lam hi hmang uar ila a tirah dam nghal vut lo mah se, a dam a nghet a, a dam a chiang bik a, nghawng tha lo a nei tlem bawk a ni.
Heng a hnuaia mite hi mahni in lama kan hmuh mai theih leh sum sen vak ngai lova kan hman tangkai mai theih a ni a, i kala fel lova i hriat chuan a engemaw ber hi regular takin hman tum ang che.
Baking Soda: Tuisik thianghlim no khatah baking soda thirfiante khat chawhpawlhin nitin no khat in thin tur.
Purunvar : Chaw ei apiangin purunvar (Garlic) fang/mum 5 tal hmeh tel thin tur.
Parsley Juice : Nitin parsley (Dhania) chhum tui no khat in thin tur.
Theitui : Theitui eng chi pawh nitin in a tha a, Nimbu/Hatkora tui nitin no khat tal in a tha leh zual.
Ramtheihmu tui : Nitin Ramtheihmu tui rial no khat in thin a tha.
Vitamin C : Nitin Vitamin ‘C’ ei thin a tha.Vitamin ‘C’ hi conventional medicine ni tho mah se, nghawng tha lo lutuk a nei lo nia ngaih a ni. Nitin puitling tan 500mg vawi 2 zing leh tlaiah thla khat chhung ei a tãwka ngaih a ni. Naupang tan 250mg nitin vawi 2 zing leh tlaiah ei thin a thaa ngaih a ni bawk.
Aloe Vera tui: Aloe Vera tui nitin no khat tal in thin a tha.
Apple um : Apple cider vinegar apple um no khatah khawizu fiante 2 pawlha in thin a tha.
Green Tea/Herbal Tea/Phãn : Nitin Green Tea/Herbal Tea/Phãn no 1-5 tal in thin a tha.
10.Tui Thianghlim : Nitin tuisik thianghlim tam tawk in a tha a, zan mut dawnah leh zing thawh veleh in a tha ber.
Hlo nuar : Hlonuar hnah mal 30 leh purun var mum 7 chawhpawlh densawm tui in thin a tha a, a zung chhum tui in a tha bawk.
Sumbul hnah: Sumbul sen chi emaw a var chi emaw a hnah chhumtui in thin a tha.
Ram lakhuih: Ram lakhuih zung, a hnah emaw a pil chhum tui in thin a tha.
Mithi sunhlu: Mithi sunhlu hnah emaw a zung emaw den sawm tui sãwr thianghlim taka thlitfima sãngbawl rial no khat zelin nitin vawi 2 zing leh tlaia in thin hi tha hlea ngai a ni.
Thingpui sen: Thingpui in no khat tui thianghlimah thingpui fe (black tea) eng chi pawh thirfiante 1 telh la, no ½ a nih thlengin chhuang kang la, tuktin chutiang chu zing thawh veleh kãr khat chhung in thin a tha a, hei hian kal chak lo leh kalna leh vung thlengin a chhawk zagkhai theia ngaih a ni
Heng bak pawh hi ramhmul damdawi tarlan tur tam tak a la awm thei.
A pawimawh ber chu a enga pawh khi i hmang a nih chuan i ei hunbi dik takah zel pelhsawlh lovin ei thin la, a rei lo berah thla khat emaw a aia rei emaw ei la i thatpui dan tur a chiang thei chauh ang. Vawi hnih khat eia dam mai tura inngaihna avanga damdawi ei chawlhsan chin hi natna cho chhuahna tawk lek a ni thei tih hria ang che.