Inthlan lam buaipuitu, Association for Democratic Reforms (ADR) chuan 2022-23 chhungin Assam-a political party hrang hrang zingah rorel lai, BJP chuan sum an hmu tam ber tih Election Commission (EC) hnena report an thehluhah a lang tih an sawi.
ADR-in party lian hrang hrangten EC-a report an thehluh a zirnaah party-te hian an sum tam ber hi pawisa thawh (donation leh contribution), fee leh subscription atangin a ni tih an sawi a. BJP hian 2022-23 chhungin Rs Vbc 989.707 zet pawisa thawh an dawng a, perfume siamtu lian, Badruddin Ajmal-a kaihhruai All India United Democratic Front (AIUDF) erawh chuan thawh atang hian Rs Vbc 0.157 chauh an dawng thung.
BJP hian thawh an dawn bakah hian bank-a an pawisa dah pung, party fee subscription atangin an hmu nual bawk a. Saffron party hian Rs Vbc 1,027.339 zet pawisa hmu hmanin Assam-a pawisa hmu hnem ber an ni.
ADR chuan, “Congress-in coupon atangin Rs Vbc 110.37 an hmu a, hei hi an sum lak luh 55% chuang a ni a. Congress audit report chuan Rs Vbc 199.15 hmu chhuakin coupon bakah hian grant, thawh leh party fee atangin an hmu,” an ti.