India ram politics han thlir kual hian khawi laiah pawh mai hian voter te hip nana, a thlawna mipui dawn tur chi eng eng emaw sem hi kalphung pakhat a lo ni reng mai a. Hei hi state tam zawkah hian kalphung nghet takah an lo neih tawh a. Central sawrkar pawh hian mipuite tana a thlawna dawn theih thil hi a lo duang tam khawp mai. Rorel apiang hian an uar lehzual zel dawn ni pawhin a lang. Keini state rethei pawh hi vairam lam tih dan tho hian kan kal nasa ta hle. Sawrkarna siam tum pawhin mipui hmin nan chhuanlamah development eng eng emaw project hming hmang hian ruahmanna an siam ve mek bawk. A thlawna thil sem hian mipui rilruah thatchhiatna a thlen a, a thlawna thil dawn tum hrim hrim hi a hrisel lo ani ti pawl han awm bawk thin mahsela, a hralh a la kal zel bawk si a. Tunah pawh a hmingah sem ti silovin sem theih tur bawk an in zawrh siak niin a lang.
A hmingah Mnf party chuan SEDP an vuah a. Mipuite chu chhungkaw tinah ₹300000 theuh kan pe ang an ti a. Sawrkarna an hlawh chhuak a. Kum nga zet ro an rel ta a. Mahse an tiam angin an sem thei lo thung a. Tun inthlan lo awm turah an sem bak la sem chhunzawm turin an insawi a. A hma khan congress party chuan ₹ 100000 theuh pek an tiam a. Anni khan kum 10 ro an rel a. Tun tumah hian a hmingah Tang puihna vuahin ₹ 200000 leh a tul dan azira a aia tam pek an tiam leh ta thung. Mnf leh Congresa hian engnge an anpui ang, mipuiin an dawnsawn dan tur erawh a hriat rih loh a. Chutih laiin a thlawna sem sawichhe thin Zpm chuan Bana kaih (hand holding) tih rawn vawrh velehin hei hian a pawisa chu a project in a mamawh tam dan a zira pek theih dan turte an han puang ve leh thung a. Hengte hi kan party lian pathumte kalphung tur chu ani ta a ni. Ram puma rorel mek bjp chu tuna central in project hrang hrang hmanga an tih mekte tihchak lehzual an kalpui mai turah ngai ila. A hming hi hrang vek mahsela an tum chu hming neia mipuite hnena pawisa a thlawna pekna kawng vek a ni a. Chuvangin sem policy vek ti ila a dik tlangpui a. Tu sem tum dan hi nge mipui tan tha ber ang tih hi kan buk tur ni maiin a lang.
Mnf hian SEDP hnuaia eizawnna hrang hrangah ran vulh, lo neih, mistiri hna leh a dang dangah an pe thei vek a. An policy hnuaia lo dawng kha vannei an ni mai. Zpm hian Bana kaih chu a thlangtu mipui anni ang a, district level atangin village level-ah a thlangtu chu mipui thlante leh NGO hrang hrangte an ni ang an ti a. Mnf ah SEDP chu unit leh VC in an thlang tih kan hmu a. Engpawh nise an duhsakte hnenah an sem a. Congress hian Tang puihna ah hian a thlangtu tur hi an la puang chiah lo niin a lang a. A zar zotu deuh chu an awm leh ngei dawn tih chu hriat sa ani mai a. An zavai hian tum thuhmunah a ngaih theih ang. An tum chu mipui harsatna dawm kan vek a ni a. A tha vekah ngai ta ila.
Sem policy ah hian a pawimawh ber chu a semtu hian mipui hlawhtlinna tak tak turin an sem em tih hi a ni a. Mipuiin a zar an zo a, an hlawhtlinpui chuan a tha vek a. Mahse a semtu pawhin an pawisa sem chu mipuiin an tlakral mai mai dawn tih hre reng a an sem thin hi a pawi lai chu a ni. Thlai chi thlak hun tawh lo, fur thlen hnua lo vahna tur an han semte hi chu hlawhtlin pui ngaihna a awm lova. A hming hi hrang thliah thliah mahse a semtu in a sem hunte, tu in nge puih mamawh ngawih ngawiha hlawhtlinpui ang tihte thlir hauh lova, vote zawnna hmanrua a hmang a, pawisa sem hi ram tan a pawi a. Ram rethei takah sawrkar pawisa vaibelchhe tam tak an vawmdarh satliahah a ngaih theih a. Sem policy hi a chhe ngawt lova, hlawhtlinpui nana mipuiin an hman theih ngei tura hmalak hi a pawimawh chu ani ta a ni.