Tun hnaia PC party-in an party general secretary atanga an ban VL Thazova chuan zirtawpni khan Aizawl Press Club-ah thu thar thehdarhtute kawmin, PC party atanga chawlhtir chhan hrang hrang a puang.
VL Thazova chuan PC party hriatpuina lo leh thu tlukna ni miah lova an party Congress candidate list siam hmasak zinga an president Vanlalruata hming lang chu duh lo va, a dodal nasa ber a nih avanga ruahmanna tisukuk tua an ngaih avang te, Mizoram Secular Allliance atanga PC party inhnukdawk tura nawr tu a nih avangte, October thla tira President-in ruahman sa nei ran chunga Elected OB-te inlungrual lo tih denchhena chawpchilh taka Party hruaitu thlanna buatsaih a, an Senior Vice President leh Vice President a paih thlak a duh lohzia a tih lan avangte leh PC President in Congress a puih laia, Aizawl West II MNF candidate a puih tlat avangte a nih thu a sawi.
VL Thazova chuan, kumin tira department pakhata raltlan tanpuina tur Rs 10,000 chu an GS Organisation changtu nena an lak, reilo te chhung thil danga an lo hman hawh lawk, May 16, 2023-a an rulh leh vek tawh chu pumbilh vekah an party president-in puh a, remchang lo chunga hnawhchhuahna tirinawmtu tih ni awm taka hmanruaah an hmang leh hnuhnawh niin a sawi.
Kumin MLA inthlanpui neih tura PC party in candidate an neih dawn loh avanga Aizawl West II huam chhunga PC Thalai hruaitute’n MNF candidate an puih tur thu an puan pawh, hun danga an tih dan thin tho a nih thu a sawi bawk.