Aizawl: November 7, 2023-a Mizoram State Assembly inthlanpui lo awm tura bial 40-a candidate nih tuma hming pe mi 174-te nomination theh luh chu Inrinni khan endik a ni a. Nimin khan hming pe lut zinga pakhat nomination paper theh luh endik nawn a nih hnuah pawm leh a ni.
Mizoram State Assembly inthlan lo awm tura chuh tumte tana hming pek luh hun tawp ni, Zirtawpni tlai dar 3 thleng khan hming pe lut mi 174 an awm a. Heng candidate nih tuma hming pe lutte hi Inrinni khan endik niin hming pe lut 173-te chu pawm an ni a. Hming pe lut zinga pakhat, Lawngtlai East-a ZPM candidate tur, Dr Lorrain Lalpekliana Chinzah nomination theh lutah thil fel tawk lo a awm avangin pawm a ni ve lo thung.
Thu dawn danin Dr Lorrain Lalpekliana Chinzah nomination pawm a nih loh chhan chu, a dinna party tur ZPM hi recognised party an nih loh avangin proposer mi 10 a neih a ngai a. Proposer 10 nei tling mah se an zinga pakhat signature a awm ve loh avangin a nomination paper chu pawmsak ni ve lovin, a tukah uluk zawka endik nawn leh tura ruahman a ni.
Dr Lorrain Lalpekliana Chinzah nomination paper chu nimin khan Returning Officer (RO) hoin endik nawn leh a nih hnuah pawm niin candidate a ni thei dawn ta a ni.
Heti hian tun tum inthlanpui lo awm tura chuh tum hming pete chu pawm sak an ni a. October 23, 2023 tlai thleng inhnukdawk duh tan hun hawn a ni.