MNF Adviser Lalruatkima’n kum 2018 MLA inthlanpuia an party manifesto-te bawhzui kawngah an thawk tha hle a, zaa 80 vel an tihlawhtling nia a hriat thu a sawi.
Inrinni khan Aizawl Press Club-ah thu thar thehdarhtute kawmin Lalruatkima hian kum 2018 MNF Election Manifesto an tihhlawhtlin dan leh hmalakna hrang hrang bakah an hmalak mekte a sawi fiah a. MNF hian an manifesto chu ram leh hnam tana tha tur, uluk taka zirchiang chunga an duan a nih thu sawiin, “Kan sorkar hnu pawhin party leh minister te hian kan manifesto bu keu chung hian ram hruai hna kan thawk,” a ti.
Lalruatkima hian Pathian zarah an manifesto tihhlawhtlin an nei tam a, dan pawh an siam tha tak a, dan thar pawh an siam tam tih sawiin, “Min beitute hian hrechiang lo leh zirchiang lovin min bei thin a, tawngkam an thiam si a, an sawi tam bawk si a, tak tak emaw ti tawk tam tak an awm a ni,” a ti.
MNF Publicity Board chairman ni bawk, Lalruatkima hian an manifestoah hian hmalak miah lohna an nei lo hial nia a hriat thu sawiin, “Chuti chung chuan tihhlawhtlin nghal rum rum theih loh chi a awm a, chungte chu kumin 2023 election manifesto-ah hian kan telh zui leh a ni. Kan an manifesto hi zaa 60 vel chu kan tihlawhtlingin kan hria a, kan tihhlawhtlin rih lohte pawh nasa taka hma kan lak meknate a ni hlawm,” tiin, an ti tha thawkhat hle tih a sawi.
An manifesto-a tel lo, chief minister-in thil dang a sawi a awm nual nia sawiin Lalruatkima chuan, “Chu’ngte chu – kawng chhawng siam te, leiverh te leh a dangte an ni. Hengah pawh hian hmalakna kalpui mek zel a ni a. Leiverh lian tham tak siam turin DPR peih fel a ni tawh a, tender tihchhuah tawh a ni. Kawng chhawng pawh Aizawl hmun hnih, Vaivakawn leh Bawngkawnah siam tum niin mi thiamte pawhin an rawn en fo tawh a, hri leng avang bakah thil lian tham tak a nih avangin tum angin thil a kal rih mai lo a ni,” a ti.
Assam Rifle an chhuah theih nan hian nasa taka hmalak a nih thu sawiin Lalruatkima hian, “Union Home Minister Amit Shah ngei Aizawl-ah rawn kalin April 1, 2023 khan Zokhawsanga AR insawnna tur hmun a rawn hawng a. AR lam hi an chhuak hreh em em a, chhuak tura an hotuten an ti tawh chhungin chhuanlam chhe tete siamin an la chhuahsan lo a. Eng emaw zat chu an insuan tawh niin kan hria,” tiin, term tharah nasa taka nawr a nih tur thu a sawi.
Lalruatkima chuan MNF sorkar chu ngawi renga hnathawk mawp mawp mai thin, inpuangzar ve vak vak lo an nih avangin an hmalakna tam tak chu mipuite hian an hre tawk lo fo tih sawiin, “Hetiang a nih avang hian hnathawk mang loa min puhtute min puhna pawh hi thu taka lo ngai tawk an awm thin,” tia sawiin, Pathian leh mipui zarah MNF-in sorkarna an chang leh ngeia a rin thu leh an sorkar leh a nih chuan Mizoram leh hnam tan hian hnathawh zawh loh tam tak an la neihte chu thatho tak leh taima taka an thawh zui zel tur thu a sawi.