Ultimate Fighting Championship a lightweight champion Islam Makhachev chuan a champion kawnghren a humhim a. Amah chotu featherweight champion Alexander Volkanovski chu round khatnaah a knockout.
Abu Dhabi a Inrinni zana UFC 294 main event-ah hian kum 31 mi Makhachev hian a khingpui hi minute thum leh second 6 a kalin a knockout a. A ke veilamin chiang takin Australian fighter lu ah petin Volkanovski hi a tlu a. Makhachev-a’n kutthlak zui mahse referee in bout a titawp nghal.
Fighter pahnihte hi February thla khan an inhmachhawn tawh a, hemi tum hian Makhachev hi unanimous decision in a chak a. Tun tumah chiang taka a chak nawn leh avangin Volkanovski atan lightweight champion nih belh turin kawng a thui sawt dawn a. A bul atanga a beih that leh a ngai tawh dawn niin a lang.
“Volkanovski chungah lawmthu ka sawi. A beidawng ngai lova, round nga inbeih hi a inpeih reng. Ani hneh tur chuan knockout loh hian a theih loh.” tiin Makhachev chuan a chak hnuah a khingpui a fak a. A khingpui tura tih Charles Oliveira inhliam avangin Volkanovski hi ni 12 chiah inbuatsaihna hun neiin a inlan a ni.
Co-main event-ah middleweight title chuh tur zawnna a ngaihah Khamzat Chimaev chuan welterweight champion hlui Kamaru Usman chu majority decision in a hneh.