- Ruata
Mahindra & Mahindra company chu an sub 4 meter SUV lar leh mawi, XUV300 thar tichhuak turin an inbuatsaih mek a, thil thar hrang hrang kan hmu dawn.
Mahindra XUV300 thar hi kum 2024 kum tir lama chhuak hman tura beisei a ni a. Tunah hian company lam chuan an enchhin nasa tawh khawp mai a. A thupna ‘camouflage’ hmanga tuamin India ram kawngpui hrang hrangah ngun takin an enchhin mek a ni. He SUV hi hmanraw changkang kentel thuah pawh a elpui zingah chuan a tha pawl niin kawng tam takah compact SUV huangah hian a tha ber pawl a ni mek a. Tunah hian design leh thildangah te danglamna hrang hrang kan han hmu leh ang a, market lamah pawh Mahindra hian an chet that pui chhoh zel a beiseiawm hle a ni.
- Automatic Gearbox thar
Media report hnaivai hoin an tarlan danin XUV300 thar tur hian 6 speed torque converter automatic gearbox, Aisin atanga lak a hmang dawn a. Hei hian tuna a hman mek 6-speed vek, AMT gearbox chu a rawn thlak dawn a ni. Kan sawi fo tawh angin automatic transmission hmang lirthei hi hralhchhuah a tam telh telh a, automatic ro roah pawh a tha lehzual torque converter kan hmu tur hian leitute a hip viau tura beisei a ni a, khalh pawh a nuam zawk viau tura beisei a ni.
A khawl lamah hian 2024 Mahindra XUV300 hian 1.2 litre turbo petrol, 1.2 litre direct injection turbo petrol leh 1.5 litre diesel khawl te a hman chhunzawm hmel a. Heng khawl te hian a indawt dan hian 110bhp, 131bhp, leh 117bhp power te an pechhuak thei a ni.
- Thil thar
XUV300 tuaithar tur hian panoramic sunroof a neih hmel a, hei hi a elpui zingah chuan nei hmasa ber a ni dawn a ni. ADAS (advanced driver assistance system) technology a nei tur pawh hi thil thar liamtham tak mai a ni a, a changkangin lirthei khalhtute tan pawh himna leh awlsamna lamah nasa takin a pui dawn a ni. ADAS hi a elpui Hyundai Venue ah chuan kan lo hmu tawh a, Kia Sonet ah pawh kan hmu thuai dawn niin a lang a, hei pawh hi tuaithar turin Kia an inbuatsaih mek a ni.
- A chhunglam
Mahindra XUV300 facelift gear selector thar te zawk chu automatic gearbox hmang ho bikah a nei dawn a. A central AC vent te hi tihdanglam hret a ni ang a, a dashboard design erawh tihdanglam a la ni dawn lo a. Hetihrual hian a inang chiah chiah erawh a ni lo ang a, chhe te chuan design dang si loin an tuaithar ve dawn a ni. 2024 Mahindra XUV300 hian free-standing touchscreen infotainment system thar a nei ang a, smartphone connectivity, wireless phone charger, digital driver display leh ventilated front seat te kan hmu dawn bawk a ni.
- A landanah hmel thar
XUV300 facelift hian design and styling chungchangah chuan a aia sang ho, XUV700 te design ang a rawn pawl dawn a, a ti mawi zual hle dawn niin a lang. Mahindra BE electric SUV concept design pawh a rawn pawl viau tura beisei a ni bawk a. Thil thar kan hmuh tur dang te chu two-part front grille, C-shaped LED headlamp XUV700 atanga lak, central air intake lian zawk, alloy wheel design thar hlak, tailgate leh rear bumper khawih danglam hret bakah taillamp thar te leh thil thar hrang hrang kan hmu dawn a ni.