Thla hmasaa Maldives president thlannaa hnehna changtu, Dr Mohamed Muizzu chuan an rama a sipai dah mekte la chhuak thuai turin a ti.
“Maldives leilungah ram dang sipaite ke hniak a awm engmah kan duh lo… Maldives mipuite hnenah chu chu ka tiam kha a ni a, ka ni khatna atangin ka intiamna tihlawhtling turin ka che nghal ang,” a ti.
President thar ni mai tawh tur, November-a nemngheh tur hi BBC-in an an kawmnaah thlan tlin a nih hnuah Indian ambassador hmuin ‘Indian sipai awm zawng zawngte chu an chhuak vek tur a ni’ tih a hrilh tih a sawi.
Maldives hi ram hran ni mah se tun hma atang tawha India kaihhruaina hnuaia awm a ni a, Muizzu-a’n hma a lak tum dan leh a thil phut hian Malé leh Delhi inkar a tihchhiat ngei pawh rin a ni.
Muizzu-a Maldives president thlannaa a chak chiah pawh pawh kha India tan chuan a pawi hle a. A khingpui ber leh a thlak tur, Ibrahim Mohamed Solih-a hi an ram leh Delhi kawmngeihtirtu niin kum 2018-a thuneihna a chan atang khan an inkar a tha zual hle.
Muizzu-a erawh hi chuan Solih-a’n India nena an inkar a titha lutuk chu Maldives ram inrelbawlna hran neih leh himna atan a hlauhawm phak thei niina ngai ve thung a ni.
Muizzu-a hian India thlauh thlain China a hnaih zawk rin a ni bawk a. Maldives hnenah hian hmasawnna ruhrel dinna turin sum tam tak puktir leh grant anga kalpuia a pek ngei rin a ni.
Hetih lai hian India chuan Indian Ocean-a thliarkar ram hi atan hmun pawimawh leh a lamtanga chantir tumin a bei nasa tawh thin a, $ tluklehdingawn 2 chuang zet an ram hmasawnna turin puihna pawh a pe tawh.
A sipaite hi lak chhuah vek ngaia a awm a nih phei chuan Delhi tan a na hle dawn a ni.
Delhi hian kum 2010 leh 2013 khan Maldives hnenah helicopter pahnih a pe a, kum 2020 khan thlawhna tê a pe bawk a, hei hi ‘pawn lamah India’ tih a tlangaupuina pakhat nia sawi a ni.
Delhi hian heng hmanruate hi mi zawn leh chhanchhuahna atan bakah damdawi thil avanga mi phurh kual ngaiah hman tur niin a sawi.
Mahse, kum 2021 khan Maldivian sipaite chuan an ramah Indian sipai 75 chuang awmin heng an hmanruate hi an khalh a, an enkawl bawk niin an sawi a. He thil hian mi tam tak tithinrimin India hian heng a thlawhna pekte hi Maldives-a inbunna hmanrua atan a lo hmang lek niin an ngai a ni.
Muizzu-a hian heng sipai awm rengte hian Maldives a tiderthawng thei niin a sawi a, a bik takin Himalaya tlangdunga ramria India leh China inepna awm fovah a hlauhawm zual niin a sawi.
“Maldives hi hetiang ram lian leh chak nena inawk buai tur chuan a te lutuk. He thilah hian kan intihnawk ve dawn lo,” a ti.
President inthlan hma lawk khan president kal chhuak tur ni ta, Solih-a chuan Indian sipai awm mekte chungchang chu a nihna baka sawi mai mai a ni zawk niin BBC hnenah a lo sawi ve tawh thung.
“Maldives-a ram dang sipai awmte hi sipai anga an awmna engmah a awm lo va. Indian sipai awm mekte pawh Maldives National Defence Force hnuaiah vek an awm zawk a ni,” a ti.
Muizzu-a hian thlawhna inpek chungchang bakah hian Maldives leh India ramten tun hnaia thawhhona leh inremna an lo siam tawh zawng zawngte chu ennawn tul a ti bawk.
“Engnge heng inremnaah hian awm kan hrelo. Parliament-a sawiho a nih lai pawhin MP tam tak chuan eng nge inziak an hre lo va, eng nge inziak ka phawrh chhuak ngei ang,” a ti.
Inthlana hnehna a chan veleh khan Malé-a Chinese ambassador chuan rang takin Muizzu-a hi a lawmpui thu a sawi nghal a ni.
Chinese President Xi Jinping pawhin an inkar a that sawt tur thu a sawi ve bawk a. Inthlan lai erawh kha chuan Chinese lamtang leh Indian lamtang, Solih-a inbeihna anga thil sawi erawh Muizzu-a hian a duh lo hle thung.