India chuan a ram palaite an him a ni tih a hriat chian chuan Canadian khua leh tuite hnenah visa a pek chhunzawm dawn niin Foreign Minister S Jaishankar-a’n a sawi.
India hian September khan visa pek chhuah hi a titawp lailawk a, Canada-ah an mission-ah ‘venhimna lama invauna’ awmin hna thawh a tikhaihlak niin a sawi.
Ram pahnihte hi Sikh-ho inlak hran theih nana beitu pawl hruaitu thah a nih chungchangah an inep na hle a ni.
Ottawa chuan a hmain ‘ram palaite himna chu a ngai pawimawh tak zet’ tih a lo sawi ve tawh.
Hetih rual hian India-in an ram palaiten vauna an dawng nia a sawi chu chhanna mumal a pe lo thung.
Canadian Prime Minister Justin Trudeau-a’n September thlaa an ramin Sikh hruaitu thahnaah ‘India inrawlhna a awm thei’ nia a sawi avangin ram pahnih inkar hi a chhe hman hle a ni.
India chuan he puhna hi a pha nasa hle a, ‘thil âwm ang lo lutuk’ niin a sawi.
Hardeep Singh Nijjar-a hi Canadian khua leh tui niin June thla khan hmai tuam mipa pahnihin British Columbia-a Sikh temple bulah a car-a a awm lai an kap hlum a. Amah hi Khalistan an tih, Sikh-te tana ram hran neih duha beitute tana nasa taka thawktu a ni a, he pawl hi India chuan hnawk a ti hle a, kum 1980 chho velah khan an ramah tharum nena helna nasa tak a chhuah phahna pawl an ni.
An inkar a that vak loh hnuah hian India chuan Canada-a a mi pawimawhte himna a derthawng nia sawiin Khalistan thlawptuten an vau niin a sawi a. Hetih lai hian July thla khan Canada Foreign Minister Mélanie Joly chuan ram palaite dinhmun hi a vil reng a, an himna chu a ngai pawimawh tak zet niin X-ah a tar lang a. He thu a puan hnu lawkah hian Khalistan tantuten kawng zawhin Nijjar-a thattu zingah Indian palai pahnih an puh tel a ni.
September-a Canadian-te tana visa service a tihtawp lailawk hnuah Indian foreign ministry thupuangtu chuan Canada-a an high commission (embassy) leh consulate-te chuan ‘an hna thawh thin pangngai thawh tibuai thei vauna’ an dawng niin a sawi a. Canadian high commission pawhinan palaite chuan ‘social media hrang hrangah vauna an dawng’ niin a sawi bawk.
Kar hmasa khan Canada foreign minister chuan India-a an palai daih 41 chuan an chhuahsan tih a puang a, hei hi India-in Canada hnenah an hna thawk eng emaw zat hnukdawk tura a tih hnuah a ni a, an awm zui zel chuan an thuneihna chhuhsak an tum thu a sawi a ni.
Canadian thuneitute chuan India chet dan chu ‘khawvel dan zan palzutna’ niin an sawi a. US leh UK pawhin he thil hi tha an tih loh thu an sawi ve ve.
Pathianni khan Jaishankar chuan India hian Vienna Convention thu angin ram inpalai tawnnaah hian ram pahnih intihlungawi tawnna a ngai niin a sawi ve thung.
“Keini thu bikah hian kan inanna leh kan inkar hi Canadian miten a khirh zawngin an kaltir chhunzawm zel a ni,” tiin a thu sawina hmun pakhatah a sawi a, India leh Canada ram inkar chuan ‘a harsa lai’ a paltlang mek niin a sawi bawk.
“Kan buaina hi Canada ram politics leh policy-a peng pakhat atanga lo kal mai mai a ni tih ka sawi duh bawk,” a ti.
Canada-in India-a visa service a kalpuina chu India-ah hian hawn a la ni reng a; mahse, thawktu eng emawzat an haw avangin buaipui hun chhung a rei phah deuh thung a. Canada leh India hian an ram ve ve-ah palai 21 ve ve an awmtir mek a ni.
Trudeau-a chuan India-in an ram palaite haw tura a ti ta mai chuan ram pahniha mi maktaduai telte nun a tikhirh zual ta vek niin kar hmasa khan a sawi.
Canada hian Indian thlah mi maktaduai 1.4 chuang zet an awm a, an zingah a zahve aia tam hi Sikh niin kum 2021 chhiarpui ang chuan an rama cheng zinga 3.7% zet an tling a. India hi kum 2022 khan Canada-a zirlai thawn lut tam ram an ni bawk a, ram dang zirlai a kawl mek 40% zet hi India atanga zir niin 3,20,000 zet an tling.
Indian sorkar chhinchhiah dan chuan kum 2021 chhung khan tlawhtu Canadian 80,000 chuang a nei a; US, Bangladesh leh UK tih lovah chuan ram khat atanga tlawhtu a ngah berna a ni.