Union Home Ministry-in Inrinnia khualzinte tana tlang 137 lawn phalna a puan zinga tel, Mount Khangchendzonga tlang chu Sikkim chuan an roh em avangin sorkar thutlukna an duh lo.
“He thutlukna hi pawi kan ti a, hnuk kir se kan duh, he tlang hi kan tan chuan tlang satliah a ni ve lo va, min enkawltu tlang (guardian deity) a ni,” tiin Sikkim Bhutia Lepcha Apex Committee-a an Convenor Tseten Tashi Bhutia chuan a sawi.
Sikkim-a sorkar hmasak, Sikkim Democratic Front (SDF) khan an state-a mi, Khangchendzonga leh tlang dar 7-te chu tlang thianghlim tiin kum 2000 khan a thianghlimna vawn nun zel theih nan lawn a lo khap tawh.
India rama tlang 137 zet chu tlanglawn mi leh hawi khawthawng duh tan lawn phal a nih thu hi Ministry of Home Affairs (MHA) chuan Nilaini khan a puang a. Heng tlangte hi Jammu & Kashmir, Himachal Pradesh, Uttrakhand leh Sikkim-a awmte niin ram dang mite tan pawh hawn a ni a. Hei hi ram chhunga adventure travel industry tan chuan thu lawmawm a nih laiin duh lo an awm ta a ni.
Sikkim sorkar hian Kanchenjunga leh tlang dang 7 chu lawn a khap a, heng tlangte hi India rama tuma la lawn ngai loh tlang 18 zinga mi an ni.