Champhai district-ah inthlan ralmuang leh felfai tak neih a nih theihna tura dan leh thupek kenkawh leh venhimna chungchanga hmalakna leh inpuahchahna te thlirhovin nimin khan a kaihhnawih mipawimawhte an thukhawm.
He thutkhawmah hian Champhai North leh Champhai South bial General Observer Dr Ranjit Kumar Singh, East Tuipui bial General Observer Sanjay Kumar, Champhai District Expenditure Observer Abhishek J Jain leh Champhai District Police Observer Sukesh Kumar Jain te bakah Champhai DC&- DEO James Lalrinchhana, Champhai SP Vineet Kumar-te pawh an tel a. Champhai District-a Excise & Narcotics, Land Custom Station Zokhawthar, Customer Preventive Force Champhai, CR- PF, Assam Rifles hotute leh political party hrang hrang aiawhte an tel bawk.
Election Observer-te chuan Champhai District chu Myanmar international border thui tak awmna a nih avang leh ruihhlo leh thil dang tawlhruk thin luhka a nih avangin inthlan kaihhnawiha dan leh thupek ken- kawh leh venhimna kawnga hmalakna chak tak neih a tul thu an sawi a. Champhai District-ah inthlan hlawh- tling taka neih a nih theih nan political party te nen inpawhtlang taka hmalak ho an duh thu sawiin, a mamawh te tan engtik lai pawha biakpawh theih an nih thu an sawi.
Venhimna kawnga mawhphurna neitu Police, Assam Rifles, CAPF, leh Enforcement Agency dangte chu inpuahchahna uluk leh fimkhur taka kalpuia, inpawh tlang taka thawkho turin an chah bawk.
Political party aiawh te pawhin an hmalaknate sawiin, Champhai district election official-te hmalakna tha an tih thu leh harsatna report tur an neih loh thu an sawi.
Inthlan vuakveta Champhai district-a venhimna hna thawk turin CAPF company pahnih thleng tawhin, Company pahnih dang thlen belh tura beisei an ni a. CAPF te hian Champhai district hmun hrang hrangah patrolling kalpui mekin, Flying Squad leh Statuc Surveillance Team te nen an duty ho a, Str- ong Room an venghim mek bawk a ni.