Aizawl : Lawngtlai East biala ZPM candidate tura hming pe lut Dr Lorrain Lalpekliana Chinzah nomination paper fel tawk lo awm chungchangah, Returning Officer (RO)-in thutlukna lo siam tawh kaltlangpui a ni dawn.
Lawngtlai East ZPM candidate Dr Lorrain-a nomination paper-ah proposer mi 10 zinga pakhatin hming a sign loh avangin nomination endik ni, October 21, 2023 khan thutlukna siam theih a ni lo. A tukah Dr Lorrain-a nomination paper hi endik leh niin, RO-in a pawm sak a ni.
Dr Lorrain-a nomination paper endik nawn a nih a, pawmsak a nih hnuah, Pathianni khan Lawngtlai East biala BJP candidate NC Muankima, INC candidate H Zothangliana leh MNF candidate H Biakzauva te chuan, Returning Officer Abraham Berazi Khithie thil tih dana an lawm loh thu leh ECI-ah an thlen tur thu sawiin an tar lang.
Hetihlai hian, Election Commission of India chuan State Election department chu nimina RO in Dr Lorrain Lalpekliana chungchanga thu tlukna a lo siam tawh chu kaltlangpui turin a rawn hriattir a ni.
Heti hian, Mizoram State Assembly inthlanpui lo awm tura inthlan chuh tura hming pe lut mi 174 te chu pawm sak vek an ni ta a. Nimin lamah candidate ni tura hming pe lut zingah inhnukdawk an awm loh bawk avangin, tun tum inthlanah candidate 174 an awm dawn tih tihchian a ni ta a ni.