Mi bum thiam ho hi chuan an bum tawhte hi a thu ngai vek hmang hian vawihnih vawithum mi an bum nawn thei an ti a. Dik pawh a dik khawp mai. Hetiang ho hi chuan awihawm deuh hian thu an han sawi heuh heuh a. A awihawm leh riau thin a. Min bum leh nge nge thin an ti a.
Politics hi ram siamthatna leh mipui hmasawnna tur a ni a. Amaherawhchu inthlan lai tak hi game a ni an ti thin. Chumi awmzia chu inthlanah hi chuan inbumna thlengin a awm a. Engkim a leng vek emaw tih mai tur hian kan kalpui a. Kum 5 chhunga kan ram politics a thil thleng hrang hrang, manganthlak tak tak, kan ram dinhmun a mipui tawrhna nasa takte chu inthlanna nghawng tham a lo ni mang hauh lo niin a lang.
2018 inthlan dawnah tuna ruling party chuan mipuite chu chhungkaw tinah SEDP cheng nuaithum kan pe vek ang tiin uar takin min sawikhum a. Tunah SEDP hnuaia nuaithum dawng sawi tur reng reng an awm lova. Kha nuaithum kha an tlinna chhan ber pakhat a ni tih hi mipui pawhin kan pawm dan a ni. A dawng awmchhunte chuan Rs 25000 te an dawng a. Opposition lam pawhin an au pui nasa a nih kha. Cheng nuaithum min tiamtute hian nuaithum hmang hian min bum a ni. Nuaithum hmanga min bumna chu an zawngchhang a, tunah hian tharthawh lehin min vote chuan a bak pawh kan pe zel ang che u an ti leh a. Mipuite hian engtinnge kan chhan dawn le?
Mi bum hmang leh thiam laklawh tawhte an sawi ang deuh hian a thu ngai vêkah hian mipui tam tak chu bum kan ni leh dawn mek a. A vir tawkin Rs 25000 an han pe te te a. A dang chhunzawmna chu kan han tling leh phawt ang a, kan pek chhunzawm zel dawn an han ti ania! Inbumna kan tih tam tak hi tih luihna ni hauh lo a, keimahni duhthu ngei a kan tawn thin hi a tam hle. Min bum tum rana min rawn vehtute hi kan be tha a, kan lo welcome a nih chuan bum kan ni leh ngei dawn. Inbumna thu a nih hi kan inhrilh mawlh mawlh chunga hrilh theih hauh loh a, lo inbum tir leh thin nge kan nih a, min bumtu hian min bum nawn tawh lovang ti chunga fimkhur taka lo dawr kan nih dawn le?