MNF President Zoramthanga’n an manifesto-ah thalaite chhawmdawla hma lam an pan theihna tur an dah tih nimina MNF pisa, Hnam Rûna chhung inkhawm an neihah a sawi.
Zorama chuan thangthar zelte hnam thutlungah an harh thar mek chu lawmawm a tih thu sawiin, “Ram hrang hranga kan unauten beih an tawh mek lai hian thangtharten nationalism an champion-pui zel ang,” a ti a, thalaite pawimawhna hriain anmahni chhawmdawla hma lam an pan theihna manifesto-ah an dah tih a sawi.
MNF president chuan an party boruak a tha chho zel a, hmun hrang hrangah nationalism thlipui a thleh thar leh mek a, MNF-in lawm luh an nei nasa hle tih sawiin, “Kan bialah phei chuan lawm luh tur a inkahpupchaw nasa hle a. MNF hi Pathianin kawng laklawhah min kalsan lo vang, sorkar tura kan mamawh tawk MLA min pe ngei ang,” a ti.
Zorama chuan Myanmar leh Bangladesh-a Zohnahthlak, Mizoram raltlante chu thawn kir tura central sorkarin an ti chungin an hum tlat tih a sawi a, ngheta taka nationalism vuantute sorkar lovin, tute emaw sorkar se chuan vauna nen sum nen an bei ang a, ‘in tih tlat chuan’ tiin an ramah an thawn let tawh ngei ang, tih a sawi a, anni erawhin central sorkar thu zawm lovin an hum tlat zel dawn tih a sawi.